NALIPAY na unta siya nga nahibalik sa iyang pamilya ug makalingkawas gikan sa kalangas sa aseras nga iyang pinuy-anan sukad gipatuman ang enhanced community (ECQ) sa Dakbayan sa Sugbo.
Apan iyang kalipay makadiyot ra tungod sa mga protocol sa ECQ, hulga sa coronavirus disease (Covid-19) ug pagpuyo niya sa Dakbayan sa Sugbo, nahibalik ra dayon siya sa aseras.
Si Gerald (di tinuod niyang ngan), 53, gidala sa mga personnel sa Barangay San Antonio, Dakbayan sa Sugbo aron siya makauli sa iyang pamilya sa Barangay Catarman, Liloan niadtong Dominggo, Mayo 17, 2020.
Si Gerald taudtaod nang nagpuyo sa sidewalk sa dan P. del Rosario, San Antonio human manira ang karenderya nga iyang gialagaran isip kusinero sa downtown sa dakbayan sukad gipatuman ang ECQ.
Nagpakabuhi siya pinaagi sa tabang sa pipila ka mga lumolupyo sa Barangay San Antonio.
Matod ni San Antonio Barangay Captain Jojo Abcede nga hapon niadtong Dominggo, ang mga barangay konsehal maoy mihimo og pamaagi nga mahatod si Gerald sa Barangay Catarman.
Kini human ilang nahibaw-an nga si Gerald dunay anak nga lalake nga anaa sa Barangay Catarman nagpuyo.
"Mao nang atong gipahatud didto kay wala man siyay pamilya diri. Unya og magkasakit, walay mag-atiman,"matod ni Abcede.
Wa Dawata
Asoy ni Abcede nga sa pag-abot sa iyang mga kauban sa balay sa anak niini, wa kini dawata kay gikan sa Dakbayan sa Sugbo nga dunay kapin 1,700 ka mga kaso sa Covid-19.
"Atong gipasabot ang anak nga kon dili niini atimanon, mamahimong maglatagaw lang ang iyang amahan sa dalan nga walay kapuy-an. Gipasabot namo siya. Mao to nga sa katapusan gidawat,"dugang ni Abcede.
Si Manong Gerald nga nahinabi sa Superbalita Cebu niingon nga natulog na siya tupad sa iyang anak ug nahibulong siya nga dunay mga tawo sa gawas.
Sa pagsusi ni manong Gerald, mga personnel kini sa barangay hall sa Catarman.
Gusto siya nga kuhaon aron mabalik sa Barangay San Antonio kon diin asa siya naggikan.
"Wala man ko gina pamati sa akong kalawasan. Natulog na unta ko didto. Ila man kong gipukaw ug gikuha,"matod niya sa Superbalita Cebu.
Si Manong Gerald niingon nga ang asawa sa iyang anak bag-o lang nanganak hinungdan nga siya nisugot na lang sa kagustohan sa barangay nga ibalik siya sa Barangay San Antonio.
Dihang siya gipangitaan og barangay pass, wa siyay napakita kay wa siya makadawat kay naa ra siya magkatulganan sa aseras. Way nahimo ang Barangay San Antonio, ilang gidawat og balik si Gerald.
Protocol
Si Liloan, Catarman Barangay Captain Jimmy Maglasang, sa pagkuha sa iyang habig sa Superbalita Cebu, nipasabot nga wa silay problema sa pagdawat kaniya.
Ang ilang gusto nga mosunod sa proseso ang pagdawat.
"Actually ang nahitabo ana, gisakay na sa sakyanan sa Barangay San Antonio unya gidiretso og hatud sa iyang anak. Gani, ang anak niini wala to dawata og una kay nahadlok lag kay gikan sa Cebu City," matod ni Maglasang.
Dugang ni Maglasang nga dunay kamanduan ang ilang mayor nga dili modawat og si bisan kinsa labi na nga gikan sa Cebu City kon wa mosubay sa mga protocol.
Ang mga tawo nga gikan sa Siyudad sa Sugbo gikinahanglan unta nga gipaubos sa 14 ka adlaw nga quarantine.
Ipaubos usab unta sa bisan unsa nga Covid test.
“Ang amo lang unta ba nga moagi lang sa proseso. Hikayon lang sa Barangay San Antonio. Kon okay na siya nga wala na siya problema, among dawaton kay sa amo diri, amo man sab na nga ikonsiderar nga PUM (person under monitoring,” dugang ni Maglasang.
Si Maglasang nipasabot nga nga igo lang siya misunod sa mando ni Mayor Christina Garcia Frasco, nga mag-amping ang lungsod batok sa Covid-19.
Niadtong Sabado, Mayo 16, 2020, ang Liloan nitala sa labing unang kaso sa Covid-19, diin usa ka 38 anyos nga mabdos nga dunay kasaysayan sa pagbiyahe makatulo ka mga higayon sa Dakbayan sa Sugbo ang positibo sa sakit.