HANGTUD karong panahona, nagpabilin nga walay kaso sa coronavirus disease (Covid-19) ang Misamis Oriental.
Matud ni Misamis Oriental Governor Bambi Emano nga "exemplary" ang paningkamot sa Provincial Task Force for Covid-19 sa pagpanguna ni Dr. Jerie Calingasan uban mga mayor, bise mayor, kapitan, kagawad, frontliners ug katawhan sa probinsya gumikan hangtod karon panahona, nagpabilin nga walay natalang kaso sa Covid-19.
Sa latest record o briefer nga gipagawas niadtong May 17, 2020 sa Department of Health Center for Health Development Northern Mindanao, ang Misamis Oriental lamang ang nag-inusarang lalawigan nga hangtod karon walay natala nga nagpositibo sa Covid-19. Wala usab natala nga probable nga kaso.
Adunay 18 ka suspect, 22 ang na discharged, 16 ang outpatient ug 5 ang nakabsan sa kinabuhi.
Matud ni Emano atol sa virtual flag raising nga karon nga adunay pagbukas sa pipila ka mga establismento aron pagbalansi sa ekonomiya, iyang gikabalaka ang gitawag nga second wave sa virus labina nga adunay local transmission ang siyudad sa Cagayan de Oro kon asa walo na ang kumpirmadong kaso.
"MisOr had been always one step ahead of the virus but I feel worries to be honest I am sometimes having a sleepless night because of the current pronouncement from all sectors partners in the government, local and national when we think of relaxing and thinking of relaxing would scarily mean kahadlok ta sa gitawag nato nga second wave," matud ni Emano.
Gibutyag niini nga wala niya gikahimuot ang mabasa diha sa social media ug pipila ka tawo nga nag-ampo nga dunay magpositibo sa Covid-19 sa lalawigan apan taliwala niini magpadayon ang paningkamot sa probinsya.
"Ig-ampo hinuon nila nga magka-covid ta para politically naa silay gain and advantage while grabe ang atong pagpaningkamot. Even daghan attempts nga ga-isabotahe ang pagpaningkamot nato we will stand taman sa among makaya, hangtod sa itugot nga balaod we will stand, we will fight together," dugang ni Emano.