NAANGKON sa Ave Maria Sanctuary Park/University of San Jose Recoletos (USJ-R) Jaguars ang premirong lingkuranan sa finals human nila giusban pagmakmak ang Aerosol Lion Tiger/University of Southern Philippines (USPF) Panthers, 89-69, kagahapon sa Game 2 sa ilang best-of-three semi-finals series sa Cesafi-sanctioned 2010 Partner’s Cup seniors division sa Cebu Coliseum.

Ang Jaguars ni coach Edito Salacut, nga nakaposte sab og dakong kadaugan sa Game 1, 83-70, nagkaguliyang sa sayong bahin ug nabiyaan sila sa Panthers, 9-18, human sa 1st quarter.

Click here for Election 2010 updates

Hinayhinay nga ninggukod ang Jaguars human niadto hangtod nga nailog nila ang labaw, 33-32, sa halftime.

Puwerte kasikit ang panagsangka sa duha ka mga kampo sa 3rd quarter ug wala gyu’y bisan usa nga ninglugak sa ilang bakus.

Apan sa 4th quarter, puwerte gyung pagkausab sa dagan sa estorya gumikan kay kalit lang ningdominar ang Jaguars unya ang opensa sa Panthers ni coach Raul Latonio ningbahar og maayo ug wala gyud sila nakabawi hangtod na sa katapusang gutlo.

Gipangulohan ni Jabe Delfino ang kadaugan pinaagi sa iyang 14 puntos samtang niamot og 13 puntos kada usa sila si Kurt Amores ug Manny Gabas. Dili hinuon tanan himaya ang naangkon sa Ave Maria/USJ-R kay napakyas man ang ilang manghod nga Baby Jaguars batok sa Enervon C/University of Cebu (UC) Webmasters, 84-86, sa deciding Game 3 sa ilang juniors division semi-finals series.

Sa finals, ang Baby Webmasters makigharong sa PTT Fuel/University of the Visayas (UV) Green Lancers.

Sa laing bahin, padayon pang nagduwa sa main game gabii ang PTT Fuel/UV Green Lancers ug San Marino Corned Tuna/University of San Carlos (USC) Warriors sa Game 2 sa ilang kaugalingon nilang seniors semi-finals series diin nag-una ang Warriors, 1-0. Kon nakatabla ang Green Lancers, hayan ipahigayon karong adlawa ang ilang deciding game.