USA ka buwan ang gitagana sa Department of Education (DepEd) alang sa enrollment sa mga tinun-an sa mga pampubliko nga tunghaan.
Magsugod ang enrollment sa elementarya ug sa high school sugod Hunyo 1 ug molungtad kini hangtod Hunyo 30.
Matod ni DepEd-Central Visayas Director Salustiano Jimenez nga mamahimong online o ipaagi og text ang enrollment sa Central Visayas hilabi na sa mga dapit nga aduna gihapo'y kaso sa Covid-19.
Dugang niini nga gihuna-huna na nila ang application sa smartphones nga usa sa mga pamaagi aron maka-enroll kadtong mga wala malakip sa early enrollment niadtong buwan sa Hunyo.
Si Jimenez mipasabot nga nagpabilin nga prayoridad nila ang kaluwasan sa panglawas sa mga tinun-an ug magtutudlo karon nga nagpadayon ang krisis sa Covid-19.
Nahuman na ang survey nga gihimo sa ahensiya ngadto sa mga principal sa nagkadaiyang mga schools division ug kadaghanan nisugyot nga online o sa text ipaagi ang enrollment.
Hinuon kon aduna'y app nga pagahimuon, ang DepEd-Central Visayas na mismo ang mohimo niini ug ianunsiyo lang kini nila sa publiko.
Susama sa pamaagi sa mga tunghaan, ilaha usab kini i-anunsiyo sa publiko aron mahibawo ang mga ginikanan sa proseso sa pagpa-enroll.
Sugod usab Hunyo 1 hangtod Agusto 29 ang Brigada Eskwela karong tuiga.
Lahi kini nga brigada eskwela sa mga nangagi tungod kay hinay-hinay nga pagpangandam ang himuon sa mga tunghaan, magtutudlo ug sa volunteers aron dili risgo sa ilahang pagpangandam.
Gipahibawo usab ni Jimenez nga posible nga skeletal gihapon ang trabaho sa mga magtutudlo ug ubang personnel sa tunghaan bisan og magsugod na og report ang mga magtutudlo sugod Hunyo 1.
Online o virtual class pinaagi sa internet ug blended learning ang ipatuman sa mga klase nga aduna gihapo'y hulga sa Covid-19.
Hinuon, alang sa mga dapit sa Central Visayas nga wala ra'y problema sa maong virus, mamahimo ra nga sa tunghaan na kini mohimo sa enrollment ug sa klase.
Alang sa school year 2020-2021, magsugod ang klase karong Agusto 24 hangtod Abril 30, samtang sa Disyembre 19 hangtod Enero 4 ang Christmas break niini.