KARONG adlawa, Mayo 20, 2020 ang tagal sa pito ka mga local government unit (LGU) aron pagkompleto sa payout niini sa Social Amelioration Program (SAP).
Samtang mihatag na usab og deadline ang Department of Interior and Local Government (DILG) alang sa listahan sa mga left-out sa SAP o kining mga pamilya nga di miyembro sa Unconditional Cash Transfer (UCT) nga wa makadawat sa SAP, apan qualified nga modawat.
Matod ni Department of Social Welfare and Development (DSWD 7) Assistant Regional Director for Operations Shalaine Marie S. Lucero nga gitagalan na nila ang LGUs aron makapangandam na usab sa ikaduhang hugna sa ayuda sa gobyerno.
“We have set a final deadline so that in case there is further instruction from the Central Office on the 2nd wave of SAP, LGUs can focus working on it because the required documents are cleared and complied with,” matod ni Lucero.
Lakip sa pito nga gitagalan mao ang Dakbayan sa Sugbo, Mandaue, Toledo, Carcar, Bogo ug mga lungsod sa Balamban ug Pinamungahan.
Base sa SAP implementation tracker sa DSWD 7, anaa na sa 125 ka LGUs sa 132 ang nakahuman sa ilang payout.
Niabot na kini sa 94 sa target o 992,595 ka pamilya o nagkantidad og P5,955,570,000.
Si DSWD 7 Regional Director Rebecca Geamala, sa iyang bahin, nagkanayon nga 1,000 ka personnel sa ilang buhatan sa regional ug provincial officers gitahasan aron mo-validate sa eligibility sa SAP beneficiaries.
"This is in relation to the Memorandum Circular No. 09, Series of 2020, which mandates DSWD to conduct validation of beneficiaries within fifteen (15) days after receiving the documents that support LGUs’ completion of the distribution of the emergency subsidy," matod ni Geamala.
Samtang si DILG Secretary Eduardo Año nagkanayon nga kutob na lang Mayo 21 ang ilang gihatag sa LGUs nga mosumiter sa "left-out o waitlisted households" sa ayuda sa gobyerno.
“Nakita natin na despite the initial 18 million SAP beneficiaries, marami pa rin sa ating mga kababayan ang nangangailangan ng tulong. These left-out households, around five million of them, will be assisted kaya nakapahalaga na mabuo ng mga LGU ang listahan na ito sa lalong madaling panahon,” matod ni Año.
Gipang-uli
Dul-an sa 100 ka mga residente sa Siyudad sa Talisay niuli sa ilang nadawat nga Social Amelioration Program (SAP) nga gikan sa Department of Social Welfare and Development (DSWD) nga hinabang.
Sigon ni Felipa Solano, pangulo sa Talisay City Social Welfare And Development Office, nga kasagaran sa mga miuli mao ang nakadawat og cash assistance sa Department of Labor and Deployment (DOLE) ug Social Security System (SSS).
Anaa say uban nga nakadawat usab sa Unconditional Cash Transfer (UCT) ang niuli sa ilang nadawat sa SAP human ang uban niuli sa dihang nakadawat usab ang ilang kabanay sa SAP.
Dungag niya nga nahuman na sila ug pag-apod-apod sa SAP sa siyudad sa wa pa naabot ang deadline nga gihatag sa DSWD 7 niadtong Mayo 10, 2020.
Ang ilang gipanghatag mao ang mga gipang-uli sa mga residente, kinsa ila usab gipanghatag sa lain benepisyaryo nga wa naapil sa unang pagpanghatag.
“Ang karon na lang kay duna tay mga replacement, katong mga niuli sa ilang benefit na nadawat sa SAP kay nakadawat sad sila sa lain nga branch sa national agencies," saysay niya. (HBL, JCT)