TALIWALA sa taas nga panahon nga nahunong ang pagtuyok sa kalibutan sa boksing gumikan sa hulga sa coronavirus disease 2019 (Covid-19), nakamaneho gihapon ang nag-unang Pinoy nga mga boksidor nga magpabilin sa ilang ranking sa respetadong Ring Magazine ug Transnational Boxing Ratings Board.
Nangulo sa tapok mao si World Boxing Association (WBA) welterweight champion Manny Pacquiao, kinsa naa gihapon sulod sa top 10 sa welterweight fighters sa Ring Magazine ug TBRB.
Ang Pambansang Kamao ng Pilipinas nakalista isip No. 2 contender sa TBRB ranking sunod ni Errol Spence Jr., kinsa maoy naghupot sa International Boxing Federation (IBF) ug World Boxing Council (WBC) welterweight titles.
Samtang sa Ring Magazine, si Pacquiao, kinsa maoy bugtong 8-division world champion, nakalista isip No.3 contender sunod nila ni Spence ug World Boxing Organization (WBO) welterweight king Terrence Crawford.
Si Mark Magsayo, kinsa bag-uhay lang nakapirma og kontrata sa MP Promotions ni Pacquiao, maoy highest ranked Filipino fighter sa taas nga timbang sunod ni Pacquiao.
Si Magsayo maoy No. 5 contender sa featherweight division sa Ring Magazine apan wala siya nasulod sa TBRB.
Ang kanhi multi division world titlist Nonito Donaire ug ang kasamtangang World Boxing Organization (WBO) bantamweight king Johnriel Casimero parehong taas og rating sa Ring Magazine.
Si Donaire maoy No.1 sa bantamweight fighters sa Ring Magazine ug No.3 sa TBRB.
Samtang si Casimero maoy No.3 sa Ring Magazine ug No. 2 sa TBRB.
Ang kasamtangang IBF super flyweight champion Jerwin Ancajas maoy No.4 sa Ring Magazine ug hasta sa TBRB. (ESL)