SAMTANG ang Department of Health (DOH)-Northern Mindanao padayon sa pakigbisog niining makapatay nga coronavirus disease (Covid-19), gipahibalo ni Dr. Adriano Suba-an, DOH regional director, nga bisan toud sa giatubang nga krisis ang buhatan, pabilin naghatag og importansya sa mga notifiable diseases.
Sugod sa bulan sa Enero hangtod May 16, adunay 3,632 nga natala nga kaso sa dengue sa rehiyon.
Moabot sab sa 2,736 ang kaso sa influenza-like illness, 664 ka kaso sa typhoid fever, 396 ka kaso sa measles ug 291 ka kaso sa acute bloody diarrhea.
Kini nga mga sakit ang gikonsiderang Top 5 sa DOH nga gimonitor sa buhatan.
Gumikan niini, padayon ang panawagan ni Dr. Suba-an nga magpabakuna sa ilang mga anak kining mga ginikanan.
Lakip na niini ang padayon sa pagpatuman sa 5S aron makatabang og sugpo sa dengue.
Ang 5S mao kining search and destroy mosquito breeding sites; self-protection like using of insect repellents; seek early consultation at the neatest health care facility; support fogging, spraying, and misting in hot spot areas; ug sustain hydration.
Gihangyo sab niini ang katawhan nga imentinar ang healthy lifestyle.
Ang mga health centers sa rehiyon kanunay nga bukas ug nagpadayon sa paghatag og serbisyo sama sa konsultasyon, immunization, family planning, pre natal services ug uban pa.