Apor dili na kinahanglan og travel pass sa Misamis Oriental

SAMTANG gipatuman ang hugot nga seguridad sa matag quarantine checkpoints labina sa lalawigan sa Misamis Oriental, nakalatid sa kamandoan ni Dr. Jerie Calingasan, ang chairman sa Provincial Task Force for Covid-19, nga adunay mga personalidad nga dili na kinahanglan og travel pass ang gitugotan sa pagpasulod ug pagawas sa lalawigan kung kini sila sakop sa Authorized Persons Outside Residence (Apor).

Si Atty. Jeffrey Saclot, ang tigpamaba sa Provincial Task Force, niingon nga ang awtomatiko nga makasulod sa checkpoints gilakipan sa medical personnel ug mga nagtrabaho sa hospital, nagtrabaho sa medical ug dental clinic ug Rural Health Unit.

Mga cargo ug delivery vehicle nga wala ug adunay karga apan kinahanglan nga lima lamang ang sakay ang gitugotan nga makabiyahe.

Mga naka uniporme nga mga personahe sa gobyerno ug mga government official ug empleyado kinsa ang oras sa trabaho o official nga biyahe ang molapas sa alas 6:00 sa gabii ug kadtong naggikan gawas sa Misamis Oriental kinahanglan nga mopresentar diha sa checkpoint sa ilang travel authority.

Mga media personnel, lakip trabahante nga ang ilang establismento ang gitugotan nga ang oras sa trabaho lapas sa alas 6:00 sa gabii magpakita lamang sa ilang opisyal nga work schedule lakip mga mga trabahante nga adunay night shift ang duty ang mopresentar gihapon ug official work schedules o awtorisasyon nga nga nagserbisyo og overtime nga nahisubay sa memorandum sa gitrabahoan.

Lakip sab kadtong bout magpachek-up o magpatambal sa balay tambalanan, magbisita sa dentista ug adunay importanteng biyahe nga adunay panugot gikan mismo sa National Inter Agency Task Force (IATF), Northern Mindanao IATF ug Misamis Oriental IATF.

Dugang ni Saclot nga lakip sa kamandoan sa lalawigan ang kinahanglan ang residente sa Misamis Oriental nga mogawas sa lalawigan o moadto sa lain lugar sama sa Cagayan de Oro nga kunpirmado nga dunay local transmission ang kinahanglan nga mobalik dayon sa lalawigan sa dili pa mag-alas 6:00 sa gabii kay kon molapas niini mahimo ka o makonsidera ka nga person under monitoring ug i kwarantinas sa 14 ka adlaw.

Lakip sab kadtong residente nga taga lain lugar o residente sa Cagayan de Oro ug mobisita sa Misamis Oriental kinahanglan makabalik sa ilang lugar sa dili pa ang alas 6:00 sa gabii aron di mahimong person under monitoring o ikwarantinas sa lalawigan sa 14 ka adlaw sa lugar nga ilang giadtoan.

Apan ang Apor ang exempted niini labina niadtong nagtrabaho nga lapas sa nahisgotan nga oras sama sa overtime, night shift nga duty ug uban pa basta aduna lamang gipakita nga work schedule gikan sa kompanya nga gitrabahoan ug kompanya sab nga gitugotan sa pag-operate ubos sa General community quarantine.

Gikinahanglan lamang ang travel pass niadtong essential ang lakaw ug walay kalambigitan sa panarbaho.

Dili sab kinahanglan ang Travel pass kung gikan sa laing lugar o gawas sa Misamis Oriental kung aduna dala nga Health Certificate nga dili patient under investigation (PUI) ug PUM (person under monitoring) gikan sa lugar nga ubos sa general community quarantine.

Ug kinahanglan negatibo ang resulta sa Covid test nga adunay uban certificate of Quarantine completion o dili PUI ug PUM gikan sa mga lugar nga Enhanced community quarantine or modified enhanced community quarantine.