NAGPABILIN nga wala mahibaloan asa nagsumikad o natakdan ang mga nagpositibo sa coronavirus sa tulo ka area nga mao kining Pinikitan sa Barangay Camaman, Barangay Lumbia ug Barangay Carmen sa siyudad sa Cagayan de Oro.
Kini ang gibutyag ni Dr. Joselito Retuya, ang epidemiologist sa City Health Office, atol sa daily press briefing adlawng Martes, Mayo 19, ug niingon nga maoy rason gikumpirma nila ang local transmission gumikan kay wala silay mapasanginlan asa kini naggikan.
"Atong gi-confirm nga duna tay local transmission kay kini silang tulo wala gyod nato kapasanginlan kung asa gikan," matud ni Retuya.
Apan giklaro niini nga sa pagkakaron, dili na kaayo gagamiton ang term nga local transmission kay ang gigamit karon nga klasipikasyon sa World Health Organization (WHO) mao kining clustering cases.
"Mao na nahitabo sa ato sa CdeO dunay clustering of cases atong gilantaw wala pa tay nakita nga bag-o nga kaso nga pwede ma connect bisan asa aning tulo sa Lumbia, Pinikitan ug Carmen," sulti ni Retuya.
Sa bag-ong kalamboan kabahin sa maong mga kaso, iyang gipaabot nga ang nahibilin nga close contact sa Pinikitan nagpabilin sa City Isolation Unit (CIU) ug walay gipakita nga unusual sign and symptoms. Padayon sila nga asymptomatic ug gi-reswab ug gipaabot ang resulta niini.
Samtang ang close contact sa kaso sa nagpositibo nga 21 anyos nga namatay nga taga Barangay Lumbia nasuta nga silang tanan lakip mga close relatives, apil health care workers ang nigawas na tanan ang resulta sa swab test ug negatibo ang resulta kanila.
Samtang ang mga close relatives sab sa nagpositibo sa Barangay Carmen ang anaa pa karon nagpabilin sa CIU ug walay gipakita nga sintomas ang gidugang nga close contact nagpakita og mild symptoms ug gihatagan ug treatment, gi-swab ug gihulat pa ang resulta.
Gibutyag ni Retuya nga padayon ang siyudad sa paghimo og lakang aron dili na mokaylap pa ang matakdan niadtong niaging nagpositibo kinsa pulos nakabsan sa kinabuhi.