NAGPABILING anaa sa 21 ang kumpirmadong nagpositibo sa coronavirus sa Northern Mindanao.
Atol sa virtual press briefing adlawng Martes, Mayo 19, 2020, gipahibalo sa Department of Health (DOH)-Northern Mindanao pinaagi ni Regional Director Dr. Adriano Suba-an nga gikan Mayo 18, nagpabilin nga anaa sa 21 ang kumpirmadong kaso sa Covid-19 ang narekord sa rehiyon.
Sa maong gidaghanon, 8 niini ang nakarekober, 7 ang nakabsan sa kinabuhi ug adunay 6 ang kasamtangan nga nakarekober.
Sa susamang petsa, adunay kinatibuk-an nga natala nga 730 ka suspected cases kon diin 75 niini ang na-admit, 185 ang na-discharge, 409 ang outpatient ug 61 na ang nakabsan sa kinabuhi.
Samtang sa probable case, adunay 8 kung diin 4 niini ang nakabsan sa kinabuhi ug ang laing 4 gipaabot pa ang resulta.
Sa bag-ong resulta sab sa swab testing, gipahibalo ni Dr. Suba-an nga 30 ang nag negatibo sa swab test nga gilangkoban sa 11 niini naggikan sa Cagayan de Oro City; 1 sa Iligan City; 5 sa Misamis Occidental; 2 sa Lanao del Norte; 2 sa Tagoloan, Misamis Oriental; 1 sa Cabanglasan, Bukidnon; 5 sa Camiguin; ug adunay 5 ang natala gikan sa laing rehiyon.
Mapasalamaton si Suba-an nga pabilin nga pila na ka adlaw walay pagsaka sa Covid-19, hinungdan nanawagan kini sa katawhan nga anaron na ang kaugalingon isip new normal kining physical distancing, coughing etiquette, pagsul-ob og mask sa mga pampublikong lugar, pagpanghugas sa kamot gamit ang sabon ug pagdala dala og sanitizer kon mogawas.