SUPERBALITA DAVAO

Delos Reyes: Disiplina ug ang GCQ

Yanong Pagsabot

MAAYONG adlaw sa tanan. Sa mga kakunay nga nagasunod sa atong pahina matag Huwebes ug sa mga mapadayunon nga mga suki sa Superbalita matag adlaw.

Daghan na ang nalipay nga gipaubos sa general community quarantine (GCQ) ang dakbayan sa Davao ug mga dapit sa Davao Region nga gikan sa halos duha ka bulan nga gipailawom sa enhanced community quarantine (ECQ) nunot sa hadla sa coronavirus disease 2019 (Covid-19).

Human sa mga adlaw nga kita nagtuman sa lockdown, maka hinay-hinay na sa pagbalik sa pagpanikay-sikay ang katawhan labi na ang mga mitiyabaw sa kalisud nga nasinatian. Kulang ang pagkaon, ang uban nagsalig na lang sa rasyon gikan sa kagamhanan, lokal man o nasyonal nga ayuda sa katawhan.

Mga pampubliko nga sakyanan, duna nay tugotan nga mobiyahe, pipila ka tindahan mangabli na basta motuman lang sa social distancing ang katawhan ug padayon unta ta nga magmabinantayon tungod wala pa sa hingpit nga nabalik sa normal ang atong kahimtang.

Matag usa kinahanglan nga motuman sa mga pasidaan sa gobyerno ug magbaton og disiplina sa kaugalingon uban sa hunahuna nga mas grabe ang sangputan ugaling balikan ta sa virus ikaduhang higayon, o kining gitawag nga "The Second Wave."

Pipila ka katawhan maghimo og senaryo aron lang makakuha sa atensyon sa uban sama sa magtutudlo nga kuno mohatag og P50 Milyon sa makapatay kang President Rodrigo Duterte.

Ang iyang katawa nahimong pagpaghilak kay gisikop sa otoridad ug posibleng mabilanggo tungod kay hulga siya sa national security ug mawad-an pa siya og trabaho pagka-maestro. Ang ikaduha mao ang nanghambog nga iyang doblehon ang kantidad ngadto sa P100 milyon, ug unya, malampuson siyang nasikop sa otoridad didto sa Boracay.

Atong hinumdoman nga ang kakulang sa disiplina modala nato sa kaalautan ug wala tay lain mabasul kon dili kita ra sab. Aduna tinuod tay kagawasan apan dili ta gawasnon nga pasipalahan ang uban labi na ang mga naa sa kagamhanan.

Akong sublion sa pag-ingon nga mobalik ra sa ato ang atong mga binuhatan, maayo man o dautan. Alang sa atong kalambuan; matag usa angay mag disiplina sa kaugalingon aron mahimong tunhay ang dagan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph