DIGOS CITY -- Nalit-ag sa hiniusang pwersa sa otoridad ang usa ka kawani sa pribadong kompanya atol sa gipahigayong buy-bust operation atubangan sa punerarya didto sa Purok Acacia, dalang Rizal Avenue, alas 9:28 sa gabii, Martes.
Ang suspek nailhang si Harry Talingting, 27 anyos, residente sa Purok Mizrach, Barangay San Miguel, ning dakbayan.
Sa taho gikan sa Digos City Police Office, gikanayon nga nakuha sa posisyon sa suspek ang duha ka mga pakite sa gituohang shabu ug marked money nga P1,000 lakip na ang Mio nga motorsiklo sa suspek.
Gitataw ni Lieutenant Colonel Vici Anthony Tababa, hepe sa DCPO, nga nag-alayon ang pwersa sa City Drug Enforcement Unit, Provincial Drug Enforcement Unit, Provincial Intelligence Branch sa Davao Sur Police Provincial Office ug Philippine Drug Enforcement Agency sa pagsikop sa dinakpan.
Anaa na sa kustodiya sa kapolisan ang dinakpan samtang gihikay ang kasong paglapas sa Republic Act 9165 o ang Comprehensive Dangerous Drug Act of 2002.
Luyo niini, gidasig ni Mayor Josef Cagas ang kapolisan nga mas pakusgan pa ang pagukod sa mga tawo nga wa mibiya sa pagpayuhot og ilegal nga druga sa siyudad.
Nalipay ang mayor sanglit luyo sa pagpatuman sa kapolisan sa mga polisiya sa general community quarantine, nahimo gihapon niini ang ilang tahas sa kampanya batok sa ilegal nga druga.
Nagbahad sab si Cagas nga wa'y luna sa dakbayan ang mga tawo nga nagahimo og ilegal nga kalihukan ilabi pa ang pagpanumod og druga.