158,000 ka senior citizens nakadawat og P3K sa DSWD

SA KINATIBUK-AN, 158,188 ka indigent senior citizens nga mga sakop sa Social Pension Program sa Department of Social Welfare and Development's (DSWD) sa rehiyon, nakadawat na sa ilang P3,000 pension sa unang semester ning tuiga, Miyerkules, Mayo 20, 2020.

Si Shalaine Lucero, assistant regional director sa DSWD 7, niingon nga kini 58 porsyento sa kinatibuk-ang target nga 271,279.

Ang payout sa rehiyon nagsugod niadtong Abril 22.

Ang social pensioners, matod ni Lucero, nakadawat og kapin sa P3,000 kay wa sila mahatagi niadtong 2019.

Ang Social Pension usa ka programa ubos sa Republic Act No. 9994 kun "Expanded Senior Citizens Act of 2010."

Kini naglatid sa paghatag og binuwan nga stipend nga P500 sa senior citizens isip pangdugang sa ilang inadlaw nga panginahanglan ug tambal.

Ang DSWD, aron mas maayo ang dagan sa payout, ang ilang field officers ninghatag og opisyal nga listahan sa pensioners sa local government units (LGUs).

Moumol usab sila og memorandum of agreement (MOA) alang sa distribution sa grant labina atol sa pagpatuman sa enhanced community quarantine (ECQ). Kon maumol na ang MOA, ang DSWD, pinaagi sa ilang field offices, mo-transfer sa funds ngadto sa hingtungdang LGUs alang sa payout ngadto sa beneficiaries. (WBS)