CALBAYOG City, Samar - Pito ang kompirmadong patay samtang duha ang samdan sa dihang nag amok ang kanhi sundawo sa P1, Barangay Gadgaran, Calbayog City, Samar, pasado alas 5 sa hapon, Martes, Mayo 19, 2020.
Giila ang suspek nga si Glenn Balonan, nagpuyo sa maong lugar.
Ang mga nangamatay mao sila si Carlo Saldania, 28; Garry Saldania, 34; Jalita Ramada; Vicente Lozano, 66; Jimmy Jadulco, 45; Leopoldo Molat y Galo (dead on the spot), 64.
Ang duha nga nangasamdan mao sila si Humphrey Tacaldo, 54, gov’t employee, taga P-1, Brgy. Gadgaran, Calbayog City ug Janine Barreto, sales lady, taga P-2 sa nahisgutang barangay.
Ang kapulisan sa Calbayog pinangulohan ni Police Lieutenant Colonel Niel Montaño niresponde sa insidente ug ilang naabtan si Balonan nga hubog ug armado.
Ila unta kining gipakalma, apan nisukol kanila.
Base sa inisyal nga imbestigasyon, si Balonan hubog.
Nagdala kini sa iyang pistola ug way puas nagpasalba ug kalit nga namusil sa iyang mga silingan.
Walo ang nangaigo ug unom niini ang dead on arrival sa Calbayog District Hospital.
Napatay usab sa kapulisan si Balonan human sa komprontasyon.
Padayon pa ang imbestigasyon sa kapulisan sa hinungdan sa pag-amuk ni Balonan. (JKDP)