Lockdown sa sityo Zapatera gilibkas

GILIBKAS: Nagdasok ang mga tawo sa main nga agianan sa sityo Zapatera, Barangay Luz, Dakbayan sa Sugbo human gilibkas ni Mayor Edgardo Labella ang lockdown sa Mayo 20 nga gisugdan pagpatuman niadto pang Abril 7, 2020. Ang sityo mao ang nag-unang epicenter sa coronavirus disease (Covid-19) sa dakbayan. (Amper Campana)
GILIBKAS: Nagdasok ang mga tawo sa main nga agianan sa sityo Zapatera, Barangay Luz, Dakbayan sa Sugbo human gilibkas ni Mayor Edgardo Labella ang lockdown sa Mayo 20 nga gisugdan pagpatuman niadto pang Abril 7, 2020. Ang sityo mao ang nag-unang epicenter sa coronavirus disease (Covid-19) sa dakbayan. (Amper Campana)

GILIBKAS na sa Cebu City Government ang lockdown sa sityo Zapatera, Barangay Luz, Mayo 20, 2020 nga maoy unang gihugpaan sa coronavirus disease 2019 (Covid-19) sa Abril.

Ang sityo gi-lockdown sugod niadtong Abril 7.

Si Mayor Edgardo Labella nilagda og Memorandum No. 2020-296 nga gipadala ngadto sa Cebu City Police Office, Cebu City Health Department ug Cebu City Disaster Risk Reduction and Management Office para sa pagpatuman.

Niadtong Mayo 18, ang Barangay Luz nipalabang og resolution no. 20-040 nga nag-rekomendar sa paglibkas sa lockdown sa ilang sityo.

Niadtong Mayo 19, ang City Government nipagawas og 51 ka individual gikan sa barangay isolation center (BIC) human nag-negatibo na sa Covid-19 base sa resulta sa swab tests.

Sila gipabawnan og tag 25 kilos nga bugas humay para aduna silay malung-ag sa mosunod nga mga adlaw.

Ang paglibkas ni Labella gihangop sa taga barangay Luz hilabi na ni Kapitan Ronnie Sab-a.

Iyang gihulagway nga medyo makaginhawa na sila og diyutay ug nigaan gaan ang ilang preparasyon.

Si Sab-a nitug-an nga katapusang adunay positive sa Zapatera sa miaging semana, nga naglakip sa pito nga asymptomatic sa Covid-19.

Ang tanan pulos tua nakapahiluna sa BIC.

Apan giklaro sa barangay kapitan nga taliwa sa lifting sa lockdown, padayon gihapon ang ilang implementasyon sa ECQ ug estrikto ang pagpasulod ug gawas sa border sa ilang barangay.

Si Cebu City Administrator Floro Casas Jr. nagkanayon nga sa higayon nga magnegatibo na usab ang swab test sa ubang mga naka-isolate sa BIC, ila na usab kining pagawson aron makabalik sila sa ilang pamilya.

Samtang adunay dugang 18 ka kaso sa Covid ang Cebu City.

Kini nagagikan sa barangay Pasil (7); Duljo (3); Sawang Calero (2); Suba (2); Tejero( 1); Mambaling ( 1); Labangon (1); Apas (1); ug adunay upat nga bag-ong naka-recover.

Sa kinatibuk-an, ang Cebu City adunay 1,782 ka mga kaso ug 108 ang kinatibuk-ang naka-recover batok sa virus ug 16 ang namatay kun 0.89% sa tanang mga kaso. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph