SAMTANG nagkadugay ang enhanced community quarantine (ECQ), miminos pa og maayo ang gidaghanon sa mga krimen.
Ang miminos og maayo ang mga kawat sa motorsiklo ug tulis.
Matod ni Police Colonel Josefino Ligan, officer-in-charge sa Cebu City Police Office (CCPO), nga sukad gipatuman ang ECQ niadtong Marso 16 hangtod Mayo 19, naka tala lang sila og 125 ka mga krimen.
Ang labing dako og ubos mao ang kawat sa mga motorsiklo. Gikan sa Enero ngadto sa Marso 16, ni-record sila og 43 ka mga kaso. Apan Marso 16 ngadto sa Mayo 19, usa na lang kun 93.3 porsyento nga pagkunhod.
Sa tulis, ni-record sila og 53 ka mga kaso gikan sa Enero hangtod sa Marso 16, apan sa Marso 17 ngadto sa Mayo 19, unom nalang kun 88 porsyento nga pagkunhod.
Ang mga kaso sa kawat nius-us og 76 porsyento kay gikan sa 200 sa nahisgutang mga petsa, 48 na lang ang ilang natala gikan sa Marso 17 ngadto sa Mayo 19.
“Ang situation nato when it comes to peace and order specifically on the 8 focus crimes for Cebu City, we only recorded for the 63 days 125 crime incidents. That is 265 less incidents kon i-komparar nato didto sa January 13 to March 16 2020,” matod ni Ligan.
Dugang ni Ligan nga nagpadayon usab ang ilang pagpanakop sa mga makalapas sa mga ordinansa sa siyudad sa Sugbo ning pagpatuman sa ECQ.
Sa record nga gibutyag ni Ligan, moabot sa 2,259 na ka mga tawo ang ilang nadakpan, 1,644 napasakaan og kaso ngadto sa korte.
Aduna gipasidad-an labi na kadtong naabtan sa mga pulis nga wala mag sul-ob sa ilang mask nga moabot og 3,853 ka mga tawo ug 401 ka tawo ang gipa multa. (AYB)