MIPASALIG si Lapu-Lapu City Mayor Junard Chan sa senior citizens o o persons with disabilities (PWDs) niadtong way masugo sa pagkubra sa ilang cash gifts nga gisugdan sa pagpanghatag niadtong Miyerkules, Mayo 20, nga ihatod kini sa ilang tagsatagsa ka mga balay.
Samtang, adunay senior citizens nga hayan upat ka managlahing cash gifts ang madawat: (1) mid-year bunos, (2) kon PWD ang maong beneficiary makakuha sab kini sa hinabang, (3) birthday cash gift kon natumong sa Abril 16 –Mayo 31 ang adlawng natawhan, ug (4) ang social pension gikan sa Department of Social Welfare and Development (DSWD).
Gihulagway ni Chan nga hapsay ang pagpahigayon sa unang adlaw sa distribution human nga iyang gisuroy ang mga barangay nga adunay taas og populasyon sama sa Barangay Basak ug Pajo.
Matod pa sa dihang nahinabi sa Superbalita Cebu nga adunay holding center nga gitagana sa matag tunghaan diin gihimo ang pagpang apud-apod ilabi na ang pagtamod sa social distancing.
Apan tungod sa padayon nga pagpatuman sa curfew lukop dakbayan, ang mga senior citizen ang gidid-an nga mogawas aron mangunay og kubra sa cash incentives.
Hinungdan nga ang ilang sakop sa banay, higala o silingan ang mamahimo mapamalihugan pinaagi sa authorization letter, magdala og identification card ug ang senior citizen ID sa beneficiary.
Sa kadtong mga senior nga way masangpit o mapamalihugan sa pagkubra mahimong motawag sa city hall hotline og mapahibawo aron nga mahan-ay sa disbursing officer sa Lapu-Lapu City Hall ang paghatod sa maong pundo ngadto sa panimalay sa maong beneficiary. Ang senior citizen sa siyudad sa Lapu-Lapu ang makadawat og mid-year bunos nga P4,000 samtang P3,000 alang sa PWDs.
Sa mga senior citizen kansang birthday nasulod sa Abril 16 ngadto na sa Mayo 31 aduna birthday cash gift nga P1,000 ug gikan sa DSWD nga P3,000.
Subli nga gipahibawo ni Chan sukad kagahapon, Mayo 20 ngadto na sa Mayo 22 ang distribution ngadto sa mga tunghaan diin nasakop ang barangay ug gipatuman ang alphabetical order sa pagpanghatag.
Nasayran nga adunay 26,530 ka mga senior citizen ug kapin sa 6,000 ka mga PWD ang 30 ka mga barangay sa Lapu-Lapu. (FVQ)