SA 22,049 ka blood samples nga na-test pinaagi sa rapid anti-body diagnostic test, 95.6 porsyento negatibo samtang 1.9 porsyento ipailawom sa swabbing.
Sa regular nga press briefing ni chief pathologist Jean Loreche sa Department of Health (DOH) 7 alang sa updates sa rapid diagnostic testing, moabot lang og 422 ka blood samples ang ilang ipailawom sa swabbing base sa date sa Mayo 19, 2020.
Mao kini ang blood samples nga ilang natigom gikan sa mga siyudad sa Sugbo, Mandaue ug Lapu-Lapu nga nakit-ang dunay presensya sa anti-bodies.
Duna na karoy 206 ka mga tawo gikan sa tulo ka mga siyudad nga gipailawom sa swabbing.
Sa Mayo 19, 42,774 ka mga tawo sa tulo ka mga siyudad ang ningpakuha og dugo sa mga barangay.
Cebu City
Niabot na og 67.75 porsiyento ang accomplishment sa Cebu City Goverment sa ilang nagpadayong strategized community testing batok sa coronavirus disease 2019 (Covid-19) hangtod sa Mayo 19, 2020.
Wa pa kini labot sa resulta sa Mayo 20 nga gituohang mas daghan ang nangapil.
Si Loreche nagkanayon nga 11,881 ka mga individual gikan sa 17,536 ka mga household nga maoy target ang nagpakuha og dugo.
Paspas ang pagdaghan sa nagpakuha og dugo human gi-extend sa siyudad og tulo ka adlaw ang ilang rapid testing nga nahuman unta niadtong Mayo 15, apan gilugwayan hangtod sa Mayo 20, 2020
Ang resulta sa duha ka mga barangay sa Dakbayan sa Sugbo maayo na nga timaan.
Sa Basak San Nicolas, sa target nga 650, niabot ang ilang nakuhaan og dugo og 807 ka mga tawo.
Si Barangay Kaputan Norman Navarro niingon nga midaghan ang nagpakuhag dugo tungod sa ilang information campaign. Pipila sa ningpakuha kanila gikan sa kasikbit nga mga barangay.
Nitugot siya kay di man sa barangay ang test kits, iyaha kini sa Siyudad.
"Duna tay mga miari nga sa laing barangay ato lang guihapong gidawat kay para man ni sa tanan ug gikan pud ni sa Siyudad,” sulti ni Navarro sa Superbalita Cebu.
Si Bacayan Barangay Kapitan Zenaida Colina niingon nga nanobra usab sa target ang gidaghanon sa mga nagpa swab tungod sa pagdagsang sa mga tawo sa ikaduhang hugna.
Mga alas 5 pa lang sa buntag, duna nay mga tawo nga naghuwat sa gym sa barangay.
“Moabot og 441 ang ni avail. Naa pay nabalibaran nga 5 kay nahutdan na sila (tigkuhag dugo) og tube,” matod ni Colina sa Superbalita Cebu.
Niadtong unang adlaw, duna lay 154 ka mga tawo ningpakuha og dugo.
Tungod sa resulta sa Mayo 20, nanobra sila sa ilang target nga 460 ka mga lumolupyo kay niabot ang tanan og 595.
Lapu-Lapu
Gihulagway ni Lapu-Lapu City Mayor Junard Chan nga malampuson ang gipahigayong rapid diagnostic test.
Kini human nilapassa target ang nipaubos sa test, sumala pa sa mayor.
Matod ni Chan miabot og 17,155 ang na test sa kagamhanan gikan sa 30 ka mga barangay sa dakbayan lakip na ang sa isla sa Olango.
Nag-target lang unta sila og 10,477 apan nilapas sila og 163 porsyento sa target.
Gipasalamatan ni Chan ang tanang Oponganon sa ilang kooperasyon .
Mayo 15 nahuman ang schedule unta sa RDT sa dakbayan, apan adunay mga barangay nga gamay ang nagpa test hinungdan nga giusban niadtong Lunes, Mayo 18.
"Dili sayon ang adlaw-adlaw nilang gisagubang (mga health workers) para maserbisyohan ang katawhan, daghan usab salamat sa mga Barangay officials," sumala ni Chan.
Niadto ra sang Lunes nihunong ang Mandaue City human nila makuha niadtong Lune sang 109.97 porsyento sa ilang target. (JJL, PAC, GCM)