MAKADAGHAN nako makadungog ning maong pulong. Nalumos daw sa sabaw mao nga di na igkita sa mga bata ang ilang amahan. Mao ni kasagaran nga irason sa mga inahan nga naghambin og grabing kasuko sa ilang mga bana nga nahanaw na. Posibling ang hinungdan tungod kay midula og laing team mao nga nag-antos ang asawa ug mga bata.

Click here for Election 2010 updates

Mao ni nahitabo ni Artemino Cagadas, lumad nga taga General Santos City. Tungod sa iyang pag-insister pagpangita sa iyang amahan, mao nga gitubag siya sa iyang inahan nga nalumos kini sa sabaw. Sa ato pa namatay na. Dinhi nagsugod ang kalbaryo ni Artemino sa dihang nahiabot siya dinhi sa Sugbo. Nahimo siyang kabahin sa mga libud-suroy nga kabataan ug ang iyang teritoryo mao ang Fuente Osmeña. Apan wa lang sab damha kalit nga dunay misapupo sa iyang pagpatun-og daplin sa aseras.

Ang Christ for Asia, usa ka sentro nga nag-atiman sa mga street children, maoy mihalili sa kakulang sa gugma nga ilang gipangita gikan sa usa ka ginikanan. Hangtod nga siya napa-eskwela sa grade one sa pangedaron nga 12 anyos. Ug niadtong Huwebes usa na siya ka malampuson nga gradwado sa high school sa pangedaron nga 23 anyos.

SUGILANON

Kining sugilanon ni Artemino tuyo nako nga gipaambit kaninyo sa pamasin nga mahatagan nato og igong kaisog ang uban natong kaigsuonan nga dunay susama niya og kahimtang. Ang akong buot ipasabot mao kadtong mga batan-on nato diha nga naglatagaw sa kadalanan nga way tumong. Manghinaot nga masabtan ninyo ang nahitabo ni Artemino nga kanang inyong gipili nga dalan wa gyu’y padulngan. Gawas kang Artemino daghan pa sa mga batan-on nga akong nailhan nga mi-arang-arang karon ang kahimtang human sa ilang pagpatun-og sa aseras.

Gumikan kana sa pagpakabana sa mga institusyon nga nag-atiman sa libud-suroy nga mga bata. Mao nga sa recognition ceremony niadtong Huwebes uban sa Task Force on Street Children uban sa ilang Chairperson nga si Mrs. Margot Osmena, gihulat gyud nakong mopaso ang mga honor student. Sa mga street children nga ilang napaeskwela upat ka buok migradwar sa kolehiyo nga nagbaton og dakong dungog. Sama kang Jean Bantayan graduate sa BSED ug siya ang Magna Cum Laude sa ilang batch. Sila si Honeylyn Buezo, Milisa Magalona ug Rochie Gadapan migradwar isip mga Cum Laude.

Sa High School daghan sab ang migradwar isip Valedictorian ug Salutatorian. Samtang nga nagsud-ong ko sa ilang mga nawong nakita nako ang ubang mga bata nga hitsas sa ginikanan, sakto pa sa suportang pinansyal, apan tua sa mga barkada o gang kanunay mabuntagan. Di kaha sila maoy angayan nga malumos sa sabaw?