HUGOT nga seguridad ang gipatuman sa otoridad sa Macanhan, Barangay Carmen sa siyudad sa Cagayan de Oro human dunay laing natala nga positibo sa coronavirus disease (Covid-19) sa maong dapit.
Gibutyag ni Police Major Evan Viñas, tigpamaba sa Cagayan de Oro Police Office (Cocpo), nga naghatag na og direktiba si city director Police Colonel Henry Dampal labi na sa station commander sa Police Station 4 (PS4) sa Carmen nga pahugtan ang seguridad sa maong dapit ug magdugang og pwersa sa kapulisan.
"Atong city director directed the police station 4 commander to tighten the security kana nga area other than Zayas kini napud ang Macanhan, we have to have and additional personnel to safeguard that specific area," matud Viñas.
Gibutyag ni Mayor Oscar Moreno nga gawas sa contact tracing nga gihimo, duna na'y mga pre-emptive measure aron nga malikayan nga mas mokuyanap pa ang virus.
"Protocol na na just like what happened sa Pinikitan, sa Lumbia, sa Zone-10 sa Carmen and kaning sa Macanhan i-identify kana nga area and asa siya nagpuyo, asa siya nag standby and all that, asa siya sige," matud ni Moreno.
"The result of the initial assessment will determine initially also kung asa ang area kung kinahanglan ba nga naa ta'y cordone diha sa Macanhan," dugang pa.
Samtang gipahugtan ug gipalapdan usab ang contact tracing kalabot na niining bag-ong kaso sa Macanhan, Barangay Carmen kinsa namatay niadtong Mayo 15 ug nagpositibo sa Covid-19 paggawas sa resulta niadtong Mayo 20.
Gibutyag ni Dr. Joselito Retuya, epidemiologist sa City Health Office (CHO), nga sa pagka-admit pa lang sa maong pasyente, nagsugod na ang contact tracing ug nag-kwarantina na ang duha ka sakop niini sa pamilya ug mas palapdan pa human nga nagpositibo.
Duha sa close contact sa maong 62 anyos nga bag-ong kaso sa Covid-19 nga nagkwarantina mao ang anak ug bana niini. Gisuta pa usab kung pila ang angayang magkwarantina sa mga tinugyanan sa Health Emergency Management (Hems) nga maoy nagdala usab niini nga pasyente.
Samtang ang mga healthcare worker sa Northern Mindanao Medical Center (NMMC) ang magpahigayon usab og standard quarantine o pito ka adlaw nga kwarantina ilabi na nga duna man kini silay mga proteksiyon sa dihang nag-atiman sa maong pasyente.
Gihangyo usab ni Moreno ang katawhan labi na sa mga nakahalubilo sa maong pasyente nga mao na mismo ang modangop sa tinugyanan sa City Health Office (CHO) dili lang alang sa kaugalingon apan alang usab sa pamilya ug sa tibuok komunidad.
"I hope nga sa atong contact tracing ang mga tawo na mismo ang mo contact sa City Health Office and volunteer the information, and kung kinahanglan nga mag kwarantina then we are prepared," matud ni Moreno.
