NEGATIBO na ang mga resulta sa ikaduhang hugna pagkuha og swab sample sa tulo ka mga membro sa pamilya sa namatay nga confirmed Covid-19 patient, PH6783, niadtong Abril 18, 2020 sa Pinikitan, Barangay Camaman-an, siyudad sa Cagayan de Oro.
Nagpositibo ang tulo ka membro sa pamilya ni PH6783, kinsa pinakaunang kaso sa Covid-19 nga namatay sa Cagayan de Oro diin lakip niini ang asawa nga 65 anyos, anak nga babaye nga 31 anyos ug apo nga 19 anyos ug sa ikaduhang swab test, Mayo 21, 2020 nigawas nga negatibo na.
Gibutyag ni Dr. Joselito Retuya, epidemiologist sa City Health Office (CHO), nga nagnegatibo na ang maong mga pasyente kinsa asymptomatic hangtod karong panahona ug kasamtangang nagpabilin sa City Isolation Unit.
"The second swab result revealed or showed negative coming from Cebu. So silang tulo atong positive nga tua sa isa sa atong CIU, these are the Pinikitan relatives the wife the daughter and the grandchild or the granddaughter the second swab is already negative," matud ni Retuya.
Samtang ang laing usa ka close contact usab niining maong kaso sa Covid-19 ang nag-negatibo usab ang resulta sa repeat swab.
Gidugang ni Retuya nga pabilin pa nga siyam ang positibo sa dakbayan apan sa pagkakaron, wala nay aktibo nga kaso sa Covid-19 dinhi sa dakbayan.
"Ang active cases wala na. Actually, ang tulo nato ka asymptomatic nga positive nahimo na siyang negative but it will not decrease the number of our confirmed. Because our confirmed cases remains at nine," matud ni Retuya.
Magpabilin nga siyam ang confirmed pero ang atong cases nga active ni menus na, wala na and the fact siguro basin ibutang na nila ang tulo ka asymptomatic ngadto sa recovered so mahimo ng four atong recovered and five atong deaths," dugang pa.
Giingong magpaabot pa sa kaulohan labi na sa Department of Health nga maoy mag tag niini nga mga pasyente nga gikan sa "confirmed" paingon sa "recovered."
Sa pagsulat niini nga balita, wala nay aktibo nga confirmed Covid-19 sa Cagayan de Oro.