Lalaki namusil sa checkpoint samdan

SIKOP ang usa ka lalaki nga nisulay og sibat sa checkpoint ug giingong namusil pa sa mga otoridad niadtong Mayo 20, 2020 mga alas 6:15 sa gabii sa P3 Puerto National Highway, Cagayan de Oro City.

Ang suspek nailang si Ronald Pueblos Owapin, 43, bulag sa asawa nga taga Upper Puerto, Cagayan de Oro City.

Sa impormasiyon sa kapulisan, gikabutyag nga nagpahigayon og checkpoint ang personahe sa Police Station 6 (PS6) sa Puerto dihang kalit lang namusil ang suspek ug nisibat paingon sa sentrong bahin sa dakbayan.

Gibutyag ni Police Captain Ron Baba, hepe sa PS6, nga gi-hardol niini ang personahe sa checkpoint ug gipusil ug nisibat gani gipangita pa sa kapulisan ug nasikop ra usab kini.

"Nag-conduct og checkpoint ang atong personnel pag-abot dinhi sa tungod iya mang gi-hurdle ang atong personnel ug iyang gipusil, isa nato ka personnel gani na side swept then maong ni-retaliate ang atong tropa," matud ni Baba.

Samtang giingong duna kini kauban nga mga babaye kinsa gikabutyag nga nalambigit usab sa ilegal nga kalihokan.

"Katong babaye nga iyang pasahero involved gihapon to siya sa mga kalihokan sa gidili nga druga. Kani si Ronald Owapin ato diay tuod ning DI listed, target gihapon nato ni sa police operation," matud ni Baba.

Samtang gibutyag sa suspek nga ni-hardol siya sa checkpoint tungod kay walay lisensiya ug nidagan gawas sa sakyanan sa dihang nasamdan atol sa nahitabong pinusilay.

Gipanghimakak usab ang alegasiyon nga duna siyay armas ug gidili nga shabu gani wala siya namusil sa kapulisan.

Gibutyag usab niini nga ang maong mga babaye nga sakay kauban niini walay labot ug nadamay lang sa iyang pagsibat sa checkpoint.

Nakuha gikan sa maong suspek ang .38 kalibreng revolver, buhing bala ug illegal nga druga.

Mag-atubang ang suspetsado og mga kasong kriminal.

"The suspect was arrested and now in the custody of Police Station 6 facing criminal charges," dugang ni Police Major Evan Viñas, tigpamaba sa Cagayan de Oro police office.

Nagpahigayon pa og dugang imbestigasiyon ang kapulisan sa pagsuwat ning balita.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph