SA dihang mipanaw na sa laing kalibutan si kanhi Presidente Cory C. Aquino sa niaging tuig, nabanhaw pagbalik ang iyang ka popularidad.
Liboan ka mga dumadapig - gikan sa kabos ug hamiling banay – ang sa makausa nasubo ug naghiusa sa paghatod sa patayng lawas sa kanhi presidente paingon didto sa Manila Memorial Park.
Ang iyang pagkainila nagsugod sa kamatayon sa iyang bana nga si Senator Benigno “Ninoy” Aquino, Jr. kinsa gipatay taliwala sa iyang pagpakigbisog aron mahibalik ang tinud-anay nga demokrasya sa nasod.
Si Cory, nga usa lang ka ordinaryong asawa niadtong higayuna, maoy nisawod sa mga bunga sa binuhatan sa iyang bana ug giaswat sa katawhan aron buntugon ang diktadoryang rehimen ni kanhi presidente Ferdinand E. Marcos.
Ang anak sa pamilyang Aquino nga si Senador Noynoy Aquino, sa kalit lang, gusto usab nga mosunod sa lakang sa iyang inahan.
Gisakyan ang kainila sa mga ginikanan aron makab-ot ang tinguha nga modala sa renda sa pangagamhanan. Apan lantawon pa sa unahan kon mahisubay ba gyud siya sa subok nga iyang agian.
Si Senador Manuel Villar kinsa nagtinguha usab magpresidente sa nasod, way popularidad nga ikapanghambog.
Hinuon kon hisgutan ang pinansiyal nga aspeto, si Villar dili angay ka kompiyansaan sa iyang mga ika-engkuwentro. Pagpabaha sa iyang mga gasto maoy dakong hudlat ni Noynoy Aquino.
Apan sa kinatibuk-an ang haom nga estratehiya ra gihapon ang tiunay nga basehan.