GIKLARO sa gobyerno sa dakbayan sa Mandaue nga ang mga employer sa mga food delivery service mokuha og delivery permit aron makalabang sa general community quarantine (GCQ) areas.
Sa pakighinabi sa Superbalita Cebu ni Atty. John Eddu Ibañez, executive secretary ni Mandaue City Mayor Jonas Cortes, nga mahimo nang makahatod ang mga food delivery sama sa FoodPanda, GrabFood, Lalamove, Joyride ug uban pa kinahanglan lang sila magkuha og delivery permit.
Gipasabot ni Ibañez nga dili na kinahanglan nga tagsatagsa nga moadto pa sa Mandaue City Hall ang mga drayber.
Dugang niya, ang mga employer sa maong mga food delivery na moadto sa Business Permit and Licensing Office (BPLO) aron mohatag sa lista sa mga accredited nga mga drayber aron mahatagan sab og delivery permit.
Sa panahon nga mahatagan na sila og delivery permit mamahimo na silang mudeliver ngadto sa mga lugar nga anaa sa general community quarantine (GCQ)
Tungod wala pa maklaro ngadto sa mga drayber ang pamaagi sa pagkuha sa delivery permit, pipila ka mga drayber sa food delivery apps sama sa Joyride, GrabFood, Lalamove ug uban pa ang miadto sa Mandaue City hall aron magkuha og delivery permit.
Usa niini si Rolando Devalque, usa ka drayber sa Grabfood, nnga nisiguro siya sa pagkuha sa delivery permit aron makapadayon siya sa pagbyahe.
Gani kung sitahon siya aduna siyay ikapakita nga mahimo silang makahatod og pagkaon.
Si Darwin Faustino, driver sa Joyride, miingon nga nagkuha sila sa maong permit aron sila makalapos sa mga borders aron magdeliber.
Kadtong anaa pa sa enhanced community quarantine (ECQ) ang tibuok isla sa Cebu, adunay mga delivery niya nga mahabilin o malangan tungod dili sila makalusot sa borders.
Dugang ni Faustino nga mas maayo na nga makalabang sila sa borders aron wala nay malangan nga mga delivery sa mga kustomer.
Si Faustino ug si Devalque, ang pipila sa mga nakakuha na sa delivery permit ug mibayad sila og P275 matag permit. (KFD)