HINAYHINAY nga nanumbalik ang pagtuyok sa ekonomiya sa lungsod sa Minglanilla human sa ikaduha ka adlaw sa pagpatuman sa general community quarantine (GCQ) sa probinsya sa Sugbo.
Sigon ni Minglanilla Mayor Elanito Peña nga base sa iyang naobserbahan, nagkamaayo na og sugod ang ekonomiya sa iyang lungsod human sa pag-abli sa mga establisimento nga sirado sa panahon sa enhanced community quarantine (ECQ).
"Akong na obserbahan, okay raman gyud. Nibalik na ang activities sa lungsod labi na sa economic side," matod niya.
Apan saysay niya nga limitado gihapon ang mga lihok sa mga tawo ug kinahanglan gihapon ug quarantine passes aron makagawas ug makasulod sa mga establisemento.
Dugang ni Peña, ila usab gipakusgan nga aduna gihapon social distancing sa matag establisimento ug kanunay usab mag sul-ob ug mask ang katawhan.
Daghan na usab ang nagpa-isyu og worker pass sa maong lungsod alang sa mga trabahante nga mobalik na ug trabaho sa maong lungsod sa lain pang lugar sa probinsya sa Sugbo diin gisugdan nila niadtong Miyerkules, Mayo 21, ang unang adlaw sa GCQ.
Matod ni Peña nga kinahanglan mopakita ang trabahante og company ID ug sertipiko nga nagpamatuod nga siya empleyado sa maong kompanya.
Nag-isyu usab sila ug bag-o nga cargo vehicle passes sanglit expire na ang unang passes.
Ang Minglanilla aduna nay pito ka kaso sa Covid-19 diin duha niini ang nakarekober na ug usa ang patay.
Gilibkas na usab nila ang lockdown sa uban mga lugar nga adunay nag positibo sama sa Barangay Tunghaan ug sa Lower Pakigne. (JCT)