LAB-AS pa sa panumdoman sa bugtong anak babaye ni anhing Police Captain Delfin Bontuyan ang crime scene human gibanhigan-patay ang iyang amahan, usa ka tuig na ang nakalabay, Huwebes, Mayo 21.
Nanumbalik ang hitabo dihang gibiyaan ni Christine Claire Bontuyan ang iyang klase sa abogasiya sa University of San Carlos (USC) human siya makakita sa usa ka Facebook post nga dunay tawo nga gipusil nga susama og bayhon sa iyang amahan.
Tuod, pag-abot niya sa dapit duol sa usa ka mall sa North Reclamation Area, nakit-an niya ang iyang amahan nga nag-ubo nga wa nay kinabuhi nga naglingkod sa motorsiklo nga nakasandig sa usa ka taxi.
Tangkod na nga usa ka tuig ang nakalabay apan gipadayag ni Christine nga wala siya matagbaw sa daghang imbestigasyon. Wa pay bisan usa ka suspek, utok ug motibo nga naestablisar ang kapulisan.
Si Christine gitakdang mogradwar sa kursong abogasya karong tuiga 2020, nibutyag nga wala pa makairog ang imbestigasyon sa kamatayon sa iyang amahan.
Ang 55-anyos nga gikan nitambong og husay sa kaso sa korte sa Quimonda Building sa North Reclamation area dihang gibanhigan-patay sa dan atbang sa dakong mall sa Barangay Mabolo.
Nakaangkon og 11 ka samand pinusilan ang biktima, ang 4 niini naigo sa ulo ug ang pito sa iyang lawas. Ang krimen gihimo sa riding-in-tandem.
“Honestly, dili because wa ko kasabot nganong until now there’s no progress. I don’t think there’s progress. We don’t have any lead. Basically they’re still out there roaming around freely ang mga nag-paluyo. It's very disheartening (and) very sad to think about.. papa was part of the list of so many people who up to this day kay unsolved gani ang ilang death,” matod ni Christine.
Apan si Police Colonel Josefino Ligan, ang kasamtangan nga hepe sa Cebu City Police Office (CCPO), nagkanayon nga aduna nay lead sa imbestigasyon ga gipangulohan na sa CIDG-7.
Matod ni Ligan nga wala matulog ang kapulisan sa pagpangita sa nag patay kang Bontuyan. Adunay kuha sa CCTV camera nga mao, matod pa, gipatutukan sa mga imbestigador ug gitinguha nila nga masulbad kini sa labing dali nga panahon.
Gibalik-lantaw pa ni Christine ang pangandoy sa iyang amahan sa buhi pa nga gusto kini nga makakita nga mahimo siyang abogado.
Nangomedya pa kini kaniya nga pwede na siya nga mamatay kung malampuson sa iyang pagtungha ug mahimo nang abogada ang iyang pinangga nga dalaga.
Bisan pa man niini, matod sa batan-ong Bontuyan, maningkamot siya nga mahuman sa pagtuon ug mahimong abogada sa mosunod nga mga katuigan aron tumanon ang iyang gipasalig sa iyang amahan.
Giangkon niya nga matag adlaw mo bisita sila sa lubong sa iyang amahan sa usa ka pribadong lubanganan sa dakbayan sa Mandaue apan tungod sa Covid-19 lockdown wala na sila moduaw ulod na sa duha ka buwan.
Ang ilang gihimo mao ang paghimong replica sa lubangan sa amahan sa gawas sa ilang balay aron magpadayon ang ilang paghandom niini.