MIMAHAL ang shabu sa Dakbayan sa Lapu-Lapu tungod sa grabeng pagnihit sukad gipatuman ang community quarantine.
Ang presyo sa matag pakete midoble.
Gibutyag ni Lapu-Lapu City Office (LCPO) Director Police Colonel Clarito Baja nga nagnihit ang supply sa ilegal nga drugas sa dakbayan base sa mga dakop sa ilang mga personnel.
Matod ni Baja nga wala molugak ang ilang kampanya sa ginadiling drugas bisan kun gipaubos sa community quarantine ang dakbayan.
Apan di sama kadaghan kaniadto ang ang ilang mga dakop.
Usa sa posibleng hinungdan niini mao nga kasagaran sa mamaligyaay sa dakbayan atoa sa ubang dapit magkuhaan sa ilang supply sa ilegal nga drugas.
Apan karon nga gipaubos sa community quarantine ang dakbayan ug ubang dapit sa Sugbo, mas lisod pa ang pagpalusot sa mga border checkpoint.
Kon makalusot man, aduna usay mga barangay checkpoint, sumala ni Baja.
Nakadawat ug taho si Baja nga tungod sa ka nihit sa supply sa drugas sa dakbayan ang uban niini ipamaligya na og mahal.
Ang uban matod pa mopresyo sa usa ka pakete og P500 base sa mga taho nga iyang nadawat.
Ang pakete sa gituohang shabu giingong mag kantidad og tag P200 ngadto sa P250 kaniadto.
Si Police Lieutenant Colonel Mark Gifter Sucalit, pangulo sa City Intelligence Unit (CIU) nibutyag nga ang uban nga mamaligyaay sa dakbayan mipresyo na gayud og P500 sa usa ka pakete sauna pa apan ang nakalahi karon kay ang P500 mga kantidad sa drugas gamay na lang ang gidak-on sa pakete.
Base sa ilang monitoring, nimahal usab ang kuha sa mga mamaligyaay og illegal nga drugas sa dakbayan sa ilang supply sa ubang mga dapit sanglit lakip sad sa ilang naandang kuhaanan gipaubos usab sa community quarantine.
Gihulagway ni Sucalit nga dakong hagit karon nga giatubang sa mga mamaligyaay og ginadiling drugas ang paglusot sa mga checkpoint.
Doble hinuon karon ang pagbantay sa LCPO sa posibleng pagbalik ug palusot sa mga ilegal nga drugas sa dakbayan nunot sa pagpaubos na niini sa general community quarantine GCQ.
Gawas sa ilegal nga drugas, niminos usab ang mga krimen sa dakbayan. (GCM)