ANG Cebu City Jail male dormitory adunay dugang 23 ka bag-ong mga pasyente sa coronavirus disease 2019 (Covid-19).
Kini base sa bag-ong resulta nga gipagawas sa City Health Department (CHD) diin adunay 32 ka bag-ong mga pasyente sa Covid-19.
Kini nagdala ngadto sa 1,814 ka mga kaso sa Covid-19 sa Dakbayan sa Sugbo.
Duna say unom nga bag-ong naka-recover sa maong sakit sa dakbayan, Mayo 21, 2020
Ang Barangay Capitol Site adunay usa ka bag-ong kaso; Mambaling (1); Sawang Calero (1); Suba (1); Ermita (1); Lahug (1); San Nicolas (1); ug Bulacao (2).
Si Mayor Edgardo Labella nimando na ngadto sa city disaster, CHD ug ubang mga personnel sa pagbalhin sa mga asymptomatic Covid positive ngadto sa barangay isolation center gawas lang sa City Jail sanglit aduna silay kaugalingon nga pasilidad.
Ang mga doctor sa CHD maoy moatiman kanila ug ang City Government ang naghatag kanila sa pagkaon, vitamins ug uban nilang gikinahanglan.
Sa kinatibuk-an, niabot na og 114 ang hingpit nang naka-recover samtang 16 ang namatay. (PAC)