KON dili pa tungod sa coronavirus disease (Covid-19), anaa gyud unta sa korte makita ang iyang liderato.
Apan tungod niining gikalisangan nga krisis karon, iyang gigugol ang iyang panahon ngadto sa pag-alagad sa iyang barangay sa tinguha nga makatabang sa iyang mga kaigsuonan.
Mao kini ang gihangop nga kamatuoran sa dalan nga nasubay karon ni Jaybee Bacus Mantilla, ang kanhi pointguard sa University of San Jose Recoletos (USJ-R) Jaguars.
"Naa ra ko sa barangay hall nag stay ron. Uli ra ko sa balay basta naay kuhaon nga gamit," matod ni Jaybee kinsa, gawas sa iyang pagka basketball player, napili usab nga chairman sa Sangguniang Kabataaan (SK) sa Barangay Suba, dakbayan sa Sugbo.
Ang pagpanghatag og libreng mask, sanitizer, sabon ug vitamins maoy kabahin sa inadlawng rota ni Jaybee uban sa iyang mga sakop ug mga opisyal sa ilang barangay nga gipangulohan ni Kapitan Jojo Sable.
"Amo gi-priority gyud ang mga nag-work pa bisan pa man naa nay positive sa city, kay sila ang grabe nga expose kaayo. Then usa sad ang mga senior citizen among gihatagan ug vitamins ug mask kay sila ang dali gyud mataptan aning sakita," dugang sa 5-7 nga pointguard kinsa nakaduwa usab sa University of the Philippines (UP) Fighting Maroons sa UAAP sa niaging tuig.
Si Jaybee gradwado sa kursong Marketing Management sa USJ-R diin sa samang higayon nahimo usab siyang varsity player.
Human sa upat ka tuig nga serbisyo sa San Jose, wa usab niya palabya ang tanyag sa UP diin iyang gikauban ang mga sikat nga sila si Kobe Paras, Ricci Rivero ug Jun Manzo.
Gikan sa UP, nakatikang na usab siya og laing ang-ang sa iyang karera sa dihang gikuha siya sa Cebu-Casino Ethyl Alcohol sa Maharlika Pilipinas Basketball League (MPBL).
"Dunay ni offer nako nga laing team, pero ganahan man ko sa Cebu ra moduwa. Nindot mag represent sa imong yutang natawha," dugang sa two-time mythical five member sa Cebu Schools Athletics Foundation, Inc. (Cesafi).
Sa pagkakaron, nagtutok man tuod si Jaybee sa pagserbisyo sa barangay, apan nagpabilin gihapon ang iyang alimpatakan nga makakuha og oportunidad nga makaduwa sa D-League, ang hagdanan paingon sa katuman sa iyang damgo nga mao ang pagduwa sa Philippine Basketball Association (PBA).
"As of now focus usa ko sa pag-serve diri sa barangay, pero og naay opportunity para sa D-Leauge akong i-grab kay usa na sa akong pangandoy nga makaduwa didto. Pero as of now ako usa i-settle tanan diri," dugang ni Jaybee.
Apan taliwala sa iyang pagserbisyo, wa usab magpanuko si Jaybee sa paggahin sa iyang kaugalingong pinansiyal nga tabang ngadto sa nanginahanglan.
Tipik sa iyang suweldo sa MPBL, gigahin usab niya og tabang sa barangay alang ngadto sa mga nagkinahanglan.
"Para maka-aksyon dayon mi sa gikinahanglan sa mga youth diri sa amoa. Unya dili rasad akoy ni-donate o nihatag sir lakip na akong mga kauban nga mga konsehal nanghatag pud sila," panapos ni Jaybee. (JBM)