TAXI drayber niunay sa pagtulis sa iyang pasahero nga nagpahatod sa dakbayan sa Lapu-Lapu kagahapon sa kadlawon.
Naputos sa kalisang ang biktima nga si Lauren Quistoy, 27, dalaga, taga-Deca 1 sa Sityo Ibabao, Barangay Agus, dakbayan sa Lapu-Lapu.
Tuyo nga taxi ang gisakyan sa biktima sa iyang pagpauli aron sa paglikay nga siya tulison samtang magsakay luwan sa PUJ.
Apan gitulis na hinuon siya sa taxi driver. Ang ngan sa taxi gipugngan.
Base sa nahipos nga kasayuran sa Crime Against Property Desk sa Lapu-Lapu City Police Office (LLCPO) nga nisakay sa taxi si Quistoy gikan sa dakbayan sa Sugbo.
Sa pag-abot sa Sityo Humay-Humay, Barangay Pajo, nideklarar og tulis ang drayber.
Wa pa matino kon hait nga hinagiban ang gition o armas ba ngadto sa biktima.
Nakuha ang P1,500 ug ang cellular phone nga nagkantidad og P18,000 sa biktima.
Human niini gipakanaog dayon si Quistoy sa maong dapit ug gibiyaan sa drayber.
Apan nahinumdoman ni Quistoy ang ngalan sa maong unit ug ang kabahin sa plate number nga 372 hinungdan nga gisubay sa kapulisan ang buhatan sa kompaniya.
Atol niining pagsuwat ang kapulisan aduna nay identity sa suspek ingon man address sa gipuy-an sa maong drayber samtang nagpadayon ang follow-up operation sa kapulisan.
Sa bisan unsang higayon, gilauman sa kapulisan nga masikop ang tulisan.