NAGAGINHAWA, nakabangon, nakakaon, kauban pa ang mga miyembro sa pamilya, nagakaon og noodles ug sardinas PLUS nagabasa pa gayud og Super B, moreklamo ba kita sa dagan sa atong mga kinabuhi?
Bitaw, maayong adlaw mga kaigsuonan. Sa oras sa akong pagtulog morag gabii pa man to kay ngitngit man apan pagmata nako, ngitngit gihapon. Alas kwarto ang numero sa orasan, wala lang ko nasayod kung buntag o gabii he he! Morag mao na gayud kini ang new normal, miga kay morag wala nay kalainan kung kaadlawon ka matulog o momata ha ha ha!
Seriously, dili kini healthy alang sa atong mga kalawasan busa mas nindot nga haum ug husto sa oras ang atong pagtulog (walo pataas apan morag mabaw atong pagkatulog kung dili kaayo hago atong lawas). Diri sa among dapit, daghang mga ginikanan ang kontra sa pag-abri sa klase karong umaabot nga Agosto.
Ako pod dili uyon hangtod wala pay safe ug effective nga bakuna kontra Covid-19. Sa panahon man god karon, daghan na kaayong pamaagi nga mapadayon ang pagtuon sa atong mga kabataan. Dili kakulangan alang nako ang usa ka tuig nga dili pisikal makaadto sa eskwelahan kay pwede ra man hatagan og libro. Modules o ubang learning materials ang mga ginikanan aron tabangan ilang anak sa pagtuon.
Ang mga high school students, mas hawod pa mag kompyuter ug mag internet busa kung tagaan silag materyales nga tun-an, kaya ra nila pasadahan. Katong maglisod sa Math ug ubang subjects, pwede ra magpatabang sa silingang maestro, paryente o i-research sa YouTube, pare kay halos tanan usa na lang ka tuplok sa internet o online.
Unsaon man ang taas nga grado o degree kung maigo sa Covid ug matapos pina-live ang kinabuhi sa atong mga kaanakan? Anyway, ang atong titulo nagpasabot nga “dili kaayo ta maghuna-huna og daghang butang” ilabi na nga wala pod kaayo kitay makaplagan nga kasulbaran sa atong mga problemang ginaatubang. Limitado gayud atong kalihokan mahitungod sa pandemya.
Ang atong gobyerno walay paigong kwarta nga isuporta sa tanang panginahanglan ta. Pobre na baya ang Pilipinas bisan dili pa si PRRD o President Rodrigo Roa Duterte ang presidente. Kining uban kung maka-bash sa gobyerno, grabi. Pero kung maka “like ug share” sa Klasrum song ni Kim Chiu sadya kaayo.
Kamo ray gipangwartahan ni Chiu. Mali iyang teyorya nga kung dili ka makagawas sa klasrum kay naa kay bayolasyon unya mag-comply ka tapos “ayusin mo ang batas” pwede ng lumabas. Intawon, dili man ang violator mo fix o moayo sa batas kundi ang otoridad (klasrum officers, kongreso o senado, dili ang nag apply!).
Okay lang malingaw sa kanta kay kita tanan masipyat bah pero dili kita pagamit unya motuo kay mali gayud tong ingon niya, migo. Kung masipyat, sinsero nga mag-sorry dili mangisulto. OK? Kung walay ikatabang, maghilom na lang!
Kanang “thank more,” mao kini ang pamatasan nga atong palabihon luyo sa kapit-os sa kinabuhi, igsuon. Wala kay trabaho? Pahurot na ang kusumo? Dili ka ka-byahe aron motrabaho sama nako? Nalaay na kaayo kag pinondo sa balay?
Unsa may kalainan sa imong gibati sa akoa? Diba parehas ra tag sitwasyon nga pobrehon? Pero instead nga magbagulbol, nananum kog mga gulay sa gawas sa akong balay. Nakapangayo na gani akong mga silingan sa tanglad. Bag-o monaug sa katri, naga-ampo na pod kog pasalamat, mare sa gasa sa kinabuhi.
Makigsayod ko sa balita sa atong lokalidad ug nasud, ug padayong nakong ginaserbisyohan akong pamilya. Nagapamaligya usahay og mansanas, itlog nga maalat ug pagkaong panghimagas.
Usa ra ang atong sitawasyon apan kita ang magbuot kung unsa ang atong reaksyon o pagabuhaton. Maayo man kaayo ang Ginoo, igsuon busa magpasalamat na lamang kita sa makadaghan nga buhi pa kitang tanan keysa magsige'g huna-huna sa kalisdanan nga dili man gihapon nato masolbad karon tanan.
Usa lamang kini ka pamaagi nga makalahutay kita sa atong sitwasyon samtang wala pay klarong alibyo, igsuon. Mapasalamaton kitang tanan.