DAVAO OCCIDENTAL -- Nakadawat na og ayudang pinansyal ang 169 ka mga drayber sa lungsod sa Malita, ning lalawigan, gikan kang Dumper Partylist Representative Claudine Diana Bautista.
Ang mga drayber sa pampublikong sakyanan midawat og P3,960 matag usa niadtong Miyerkules, Mayo 21.
Ang pundong gihatag sa kongresista gipaagi ngadto sa Department of Social Welfare and Development (DSWD) ilawom sa programang Tulong Panghanapbuhay sa Ating Disadvantaged/Displaced Workers (Tupad) aron makalahutay ang mga anaa sa sektor sa transportasyon samtang gipatuman ang general community quarantine (GCQ).
Sumala ni Bautista nga unang hut-ong pa lamang sa mga drayber ang nakadawat sa ayuda apan giandam na nila ang second batch diin mokabat sa 550 benepisyaryo ang makadawat sab sa susamang kantidad karong mosunod nga mga adlaw.
Samtang, mapasalamaton ang Department of Labor and Employment-Davao Occidental sa ayuda sa Dumper Partylist aron matabangan ang mga naglisod nga drayber samtang anaa pa ang presensya sa coronavirus disease (Covid-19). (Orlando B. Dinoy)