GIDASIG ang mga Sugbuanon nga mopawong sa ilang mga suga sud sa usa ka oras sugod karong alas 8:30 sa gabii isip pagtimaan sa Earth Hour. Gitinguha nga pinaagi sa pagpawong sa mga suga ug di paggamit og kuryente sud sa usa ka oras, makadaginot ang Sugbo og 30 mw gikan sa 24 mw sa niaging pagtimaan sa Earth Hour sa niaging tuig.

Si Cebu City Councilor Nestor Archival, nailang environmentalist ug usa sa mga organizer sa Earth Hour dinhi sa Sugbo, malaumon nga dako gyung madaginot sa kuryente karong tuiga gumikan kay gawas sa mga establisementong nisaad nga moduyog kanila, nisuporta usab niini ang simbahan.

Click here for Election 2010 updates

Si Cebu Archbishop Ricardo Cardinal Vidal niluwat og memorandum circular nga nag-awhag sa kaparian sa matag parokya nga moduyog sa kalihukan.

Ang Earth Hour gitumong aron kaminosan ang epekto sa global warming kay pinaagi sa di paggamit og kuryente, maminosan usab ang pagbuga og greenhouse gas nga maoy nagdaot sa kalikupan.

Gawas sa pagpawong sa kuryente, mahimo sang mosalmot sa kawsa sa Earth Hour pinaagi sa pagboto sa www.earthour.org o sa website sa Earth Pilipinas nga http://greenarmynetwork.net/ earthhour2010. Samtang magpaabot sa countdown, usa ka kalihukan ang ipahigayon sa may SM City.

Gawas sa SM City, ang countdown himuon usab Ayala Center Cebu, Persimmon Urban Village ug sa siyudad sa Talisay ug Danao. (CPL)