Magbayaw nagtinigbasay; 1 kritikal

MANAGBAYAW nangaangol, usa kanila kritikal, human magtinigbasay niadtong Huwebes sa gabii, Mayo 21, 2020 sa sityo Lumanoy, Barangay Mulao, lungsod sa Liloan, amihanang Sugbo.

Naa sa kritikal nga kahimtang si Randy Pitogo, 41, human tigbasa ni Proceso Talisic, 40, puro mga lumolupyo sa nahisgutang dapit.

Si Police Staff Master Sergeant Jonas Catubig sa Liloan Police Station nga nahinabi sa Superbalita Cebu, niingon nga sa wa pa ang pagpanigbas, ang magbayaw nag-inom.

Matod ni Catubig nga ang duha nagkalalis nang daan sa wa pa matino nga hinungdan.

Human sa inom, tagsa-tagsa silang nanguli sa ilang mga balay. Samtang naghuwat sa panihapon si Pitogo gawas sa ilang balay, niabot si Talisic ug gitigbas ang bayaw gamit ang sundang.

Naigo si Pitogo makaduha sa ulo ug tiil. Bisan kon samaran, iyang gilayog si Talisic, giilog ang sundang ug nibawos sa pagtigbas. Si Talisic naigo sa bukton, tiil ug tiyan. Ang duha dungan nga gipangdala sa tambalanan, apan si Pitogo mas grabe og mga samad, gihulagway ni Catubig nga kritikal ang kahimtang. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph