Nanimba gamay pa kay wa pa kahibawo

HUMAN gipahibawo sa Archdiocese of Cebu ang pagbukas sa mga simbahan sa mga parokya sa mga dapit ubos sa general community quarantine (GCQ), gamay rang mga tawo nga namisita aron mag-ampo.

Gibuksan man tuod ang mga simbahan, apan gidili gihapon ang pagtambong sa mga misa ug relihiyusong mga kalihukan.

Si Monsignor Ruben Labajo, vicar general sa Archdiocese sa Cebu ug sakop sa team of pastors sa St. Francis of Assisi sa Balamban, niingon nga hayan minos pa ang mga tawo nga nasayod nga bukas na ang mga simbahan kay maglisod sila sa pagpakatap sa mga kasayuran.

Matod ni Labajo nga sa ilang parokya, ang paagi ra nila sa pagpakatap sa mga impormasyon mao ang pinaagi sa radio ug livestream.

"As per Archbishop Jose Palma said nga iabli na gyud ang mga simbahan. So i think wala pa gyud na sila na inform." Si Labajo nisulti sa Sunstar Cebu.

Sagad sa mga manimbahay mao kadtong nanghalad sa misa o kadtong nagpuyo duol sa simbahan. Matod ni Labajo nga ang mga simbahan duna pay mga pundo aron igasto sa mga galastuhan kay duna pa may mga manimbahay nga mangdonar kon magpamisa. Naa usab silay natigom sa ilang makolekta matag Dominggo.

Si Labajo niingon nga ila usab nga giswelduhan ang ilang mga staff bisan wa silay mga misa agig tabang usab kanila.

"Ang kanang pahinungod sa mga taw namo mao na among gamiton para bayad sa kuryente ug sa mga kinahanglan sa simbahan ug pang sweldo pud sa among mga empleyado," siya niingon. (JCT)