NAMATAY ang usa ka buwan nga masuso nga gikan sa lungsod sa Argao nga positibo sa coronavirus disease 2019 (Covid-19).
Kini maoy gipahibaw ni Argao Mayor Allan Sesaldo, Mayo 22, 2020. Si Sesante wa mosulti kon babaye ba o lalake ang masuso.
Matod ni Sesaldo nga ang masuso ug pamilya niini nagpuyo sa Sitio Sutil, Barangay Tulang, bukiran nga bahin sa Argao.
Giingong giubo ug naglisod pag ginhawa ang bata hinungdan nga dali nga gidala sa Deiparine Community Hospital sa Sibonga ug gi-refer dayon sa Talisay District Hospital.
Gikan sa Talisay, gibalhin dayon kini sa mga ginikanan sa Vicente Sotto Memorial Medical Center (VSMMC).
Sa Mayo 22 sa kaadlawon, namatay ang masuso. Sanglit di man madala pag-uli ang lawas, kinahanglan nga i-cremate kini.
Nipasalig ang local government unit (LGU) nga sila ang moabaga sa gastohanan sa pagpahipos sa lawas.
Human nga nakadawat og impormasyon ang LGU, dali kini nga misubay sa mga tawo nga nakahimamat sa pasyente.
Ang pamilya ug kabanay gi-isolate na samtang ang nahisgutang sitio gi-lockdown.
Gipahibawo ni Sesaldo nga ang kalangay sa pagpadangat niya sa impormasyon sa mga konstituente tungod sa protocol nga angay agian una pa ibutyag ang kompletong detalye.
Nanghinaot si Sesaldo sa mga taga Argao nga magpabilin nga alerto ug di motuo sa mga taho nga dili gikan sa LGU ug way kapasikaran. Kini aron nga malikayan ang karatol. (ANV)