MIAWHAG si Ustadz Salim Daham, sakop sa Local Office of Muslim Affairs (Loma) sa dakbayan sa Mandaue, sa iyang mga igsuon sa pagtuo nga Islam nga anha lang maghalad ug mag-ampo sud ilang balay sa pagsaulog sa Hariraya o pagtapos sa Ramadan karon, Sabado, Mayo 23.
Si Daham nagkanayon nga tungod kini sa krisis sa coronavirus disease (Covid-19) ug pagtuman sa protocol sa enchanced communirty quarantine (ECQ) nga nakaepekto pa sa Mandaue.
Naandan nga dakong piyesta ug panagtapok sa mosque alang sa mga Muslim sa pagtapos sa usa ka buwan nga puasa o Ramadan.
Gibutyag ni Daham nga sa 50 ka tuig na niyang nagsaulog sa Ramadan apan karon pa sab siya makasuway nga sa balay lang kini nila saulugon.
Apan dili malikayan nga adunay mga yangungo ang uban nilang miyembro human wala maandan nga sa balay mag-ampo ug magtapok gyud sila sa usa ka dakong lugar o sa mosque.
Sigon ni Daham nga importante ang mosque sa ilang pagsaulog sa kataposan sa Ramadan, apan dili kini nila mahimo karong panahona sa ECQ.
Gipasabot ni Daham nga ang pag-ampo sa balay labi na sa panahon sa epidemya gitugot sa Islam.
Gani sa panahon sa ilang propeta nga sa Muhammad miingon kini nga 'likay kamo sa sakit nga makatakod sama sa nidagan kamo kung makakita kamo og leon.'
"Tawo ang mo-adjust sa Ginoo. Tawo ang mo-adjust sa balaod. Dili balaod ang mo-adjust sa tawo," sigon ni Daham.
Niadtong Biyernes, Mayo 22, besperas sa Hariraya, si Daham niingon nga nag-moon sighting na sila ug kon motumaw ang new moon, timaan kini sa pagtapos sa Ramadan.
Apan kung wala pa kini mitumaw, tiwason nila ang 30 ka adlaw sa Ramadan ug magsaulog sila sa Hariraya sa Dominggo, Mayo 23.
"Ingon ang propeta nga share food and spread greetings. Panahon sa hariraya, magaksanay bisan dili kaila," matod ni Daham.
Karon sigon ni Daham nga ang ilang hikay alang nalang sa ilang pamilya ug mohatag sila sa ilang kasilinganan ug likayan lang una nila ang pag-imbitar ug panagtapok.
Sa ilang pag-ampo, sigon ni Daham, ang tanang kaayohan sa kalibutan ug sa laing kalibutan. Kaayohang pisikal o emosyonal labi na sa Covid-19. (KFD)