4 ka LGU mihangyo angkas itugot

UPAT na ka mga local government unit (LGU) ang nanghangyo sa nasudnong kagamhanan nga tugtan nga makaangkas ang mga sakop sa pamilya nga naggamit sa motorsiklo isip nag-unang pamaagi sa transportasyon.

Sila si Mayor Gerald Anthony Gullas Jr. sa Dakbayan sa Talisay, Joannes Alegado sa Consolacion ug Bise Mayor Nicepuro Apura sa Dakbayan sa Carcar nadugang sa mga opisyal sa Sugbo nga nanghangyo sa Interagency Task Force (IATF) nga tugtan nga makaangkas sa motorsiklo ang sakop sa pamilya, labina sa mga dapit nga ubos sa general community quarantine.

Ilang nakita ang kamahinungdanon sa motorsiklo karon nga limitado ang pampublikong mga sakyanan.

Si Lapu-Lapu City Mayor Junard Chan nihangyo sa IATF, labina sa Land Transportation Office (LTO), nga tugtan ang pamilya nga makaangkas sa motorsiklo, labina karon nga naa pa sa quarantine.

Ang Lapu-Lapu City mang-isyu unta og angkas card ngadto sa iyang mga lumolupyo, apan wa una idayon ni Chan kay nibaraw ang LTO.

“Ako lang unta nga mapadayon na nga pwede mag-angkas kay mao na ang main transportation sa city. Hopefully, they can reconsider their position regarding the backriders for motorcycles,” pasabot ni Gullas sa iyang baroganan atol Facebook live nga gipasiugdahan sa Office of the Presidential Assistant for the Visayas (OPAV).

Nangindahay si Gullas nga mouyon ang Department of Transportation (DOTr) pinaagi sa Land Transportation Office (LTO).

Si Apura, sa iyang bahin, nanghinaut nga ikonsiderar ang paghimo sa motorsiklo nga pampublikong sakyanan, kon di man gani, tugtan ang magtiayon nga mag-angkasay.

Alang kaniya, ang motorsiklo sulbad sa paghuot sa trapiko. Ang Dakbayan sa Carcar, labina ang kinapusoran, dunay problema sa paghuot sa trapiko.

Si Alegado, sa iyang bahin, niingon nga kay wa man matuman ang social distancing sa four-wheeled nga mga sakyanan, mas maayo pang tugtan ang publiko nga mag-angkasay sa motorsiklo.

Supak

Apan si LTO Regional Director Victor Caindec niingon nga sayon sultihon ang pagtugot pinaagi sa Angkas card, apan sila maglisod sa pagsusi kon tagsa-tagsaon.

Matod niya, kon itugot ang angkasay sa pamilya, mas maayo pang wa nay exemption.

"Ang position sa DOTr is we cannot afford to check every rider nga naay passenger and validate their identities nga related sila. Nakakita kos suggestion sa mga LGU, apan ang mga ID mismo need i-check. Kon inyong i-allow ang angkas, wala nay exemption, allow na lang nato angkas tanan kay kanang exemption nindot lang na sultihon sa tawo nga walay apil sa enforcement pero kaming naa sa grounds kami ang nabutang sa risgo," padayag ni Caindec.

Nabalaka si Caindec nga abusohan ang card.

"Ang ilang gi-propose tagaan og angkas card. Unsaon man nimo pag validate. So, imo na pud parahon unya pagpara check nimo. Mao ni card, unya asa man imo ID? Ang sunod ana naay mo fake sa angkas card kay naa man gyuy mangita og lusot. Sama ra na sa ECQ pass. Naa man gani mo fake sa drivers license," pasabot ni Caindec sa Superbalita Cebu.

Sa dihang ubos pa sa general community quarantine, sila si Chan, Cebu City Mayor Edgardo Labella ug Mandaue City Mayor Jonas Cortes nanghangyo sa DOTr nga tugtan ang mga pamilya nga mag-angkasay sa motorsiklo.

Ang hangyo sa tulo ka mga mayor wa uyoni. Ang pagdili sa angkas gisugdan sa pagpatuman sa pagsugod sa general community quarantine (GC) alang sa social distancing.

Lokal nga mga opisyal nakakita nga wa kinahanglana ang social distancing kon family members ang angkas sa motorsiklo kay nag-uban ra sila sa usa ka balay.

Apan ang nasudnong mga opisyal wa maminaw niini. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph