SUPERBALITA CEBU

Lab-asero wa kabayad sa utang, gipatay

CCTV: Si Jecery Misa Moneno, 35, suspek sa pagpatay kang Randy Aguilar, 41, nailhan human makuha sa close circuit television (CCTV) ang iyang daling pagpalayo sa crime scene sa Sityo Riverside, Barangay Guadalupe, Dakbayan sa Sugbo sa Biyernes sa gabii. (Guam P. Logrono)

LIOG sa lab-asero gigulgol kay giingong wa mobayad sa iyang utang Biyernes sa alas 10 sa gabii, Mayo 22, 2020 sa may 249 B. Rodriquez Ext., Don Jose Village, Brgy. Guadalupe, dakbayan sa Sugbo.

Si Randy Aguilar, 41, minyo patay na nga naabtan sa iyang inahan likod sa tindahan nga gibantayan.

Samtang nadakpan pagka-alas 7 sa buntag si Jecery Misa Moneno, alyas Dongkoy, 35, ulitawo, taga Sitio Riverside, Brgy. Guadalupe, apan lumad nga taga Pangatukan, Bukidnon.

Si Rita Aguirre, 67, inahan ni Randy nga nahinabi sa Superbalita Cebu, niingon nga mga alas 5 sa kaadlawon sa Sabado mimata siya kay magluto.

Apan sa iyang paglantaw, abli ang pultahan sa likod sa tindahan hinungdan nga iyang gisusi aron sirad-an.

Apan, nakugang siya kay nagbuy-od ang iyang anak nga dunay samad dinungaban sa walang ilok ug gigulgol ang liog.

Nangayo siyag abag sa iyang mga kabanay ug mga silingan aron pahibaw-on ang Guadalupe Police Station.

Sa pagrespondi sa kapulisan, ilang gisusi sa mga kabanay ug mga higala ang CCTV-footage sa apartment nga gibantayan ni Randy, duol sa ilang balay.

Nailhan

Nakita sa footage si Moneno nga nagdali sa paglakaw hinungdan nga gipangita sa mga pulis sa giestahan niini, apan sa ilang pag-abot, nakasakay na sa bisiklita.

Giapas siya sa kapulisan ug naabtan sa may dan B.Rodriguez, duol sa Vicente Sotto Memorial Medical Center (VSMMC).

Ang suspek nga nahinabi sa Superbalita Cebu niangkon sa kremin nga nahimo niya kay si Randy wa mobayad sa utang nga P1200.

"Niawas na ako kalagot niya. Puno na ko niya kay sa panahon nga maningil ko, maninghag, grabe mosulti nga makapasakit, nagkaminos nako kay di ko taga dinhi," matod ni Moneno.

Sumala pa niya nga ang kwarta giutang ni Randy kaniya sukad pagsugod sa lockdown, apan gahi mobayad.

Ang kwarta iya untang iplete sa pagpauli sa Mindano, inig libkason na ang enhanced community quarantine sa dakbayan sa Sugbo.

Apan sa wa pa niya patya, nag-inom una sila uban sa mga barkada mga alas 7.

Human nilag inom iyang giadto si Randy sa tindahan nga gibantayan.

Iya kining gipaninglan, apan wa gihapon mobayad.

Sa iyang kalagot, nipauli siya sa balay sa iyang igsuon, nikuha og kutsilyo ug nibalik sa tindahan.

Nibalik siya sa tindahan nga gibantayan ni Randy ug gikomprontase niya ug dihang nalipat, iyang gidunggab ang wala nga ilukan.

"Naglingkod man siya nag-estorya mi kanus-a gyud siya mobayad. Ako gikalitag dunggab. Lagot kaayo, ako siyang gigulgol," sumala ni Moneno.

Si Tata Aguilar, igsuon ni Randy, niingon nga wa siya makabantay nga dunay kaguliyang sa gawas sa ilang balay.

Nakadungog siya og siyagit, apan wa niya panumbalinga.

Si Tata niingon nga dunay bisyo ang iyang igsuon ug ila na kining gibadlong kay dagko na ang mga anak niini nga naa sa lungsod sa Ronda.

Ang iyang igsuon mamaligyag isda, gawas sa iyang pagbantay sa apartment nga tupad sa ilang gipuy-an.

Si Mylene, igsuon ni Moneno, nibutyag sa Superbalita Cebu nga naabot ang iyang igsuon nanghagis ,apan wa sila masayod nga nakapatay na kini.

Gihagisan sila ug gipamoak ang ilang mga butang, apan wa sila makapangayog abag dayon kay natanggong sila sud sa ilang lawak samtang ang iyang igsuon diha sa gawas, nag-atang kanila. (GPL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph