ILIBKAS na ang giluwayang enhanced community quarantine (ECQ) sa dakbayan sa Sugbo ug Mandaue karong Mayo 31, Dominggo.
Sa samang higayon, ang general community quarantine (GCQ) ipatuman, sama na sa ubang dapit sa lalawigan
Nagpasabot kini nga 7 ka adlaw gikan kason, Mayo 25, hinayhinay na nga mobalik ang negusyo sama sa malls.
Subay kini sa unang plano sa inter-agency task force (IATF), kon walay mga kausaban.
Nunot niini, ang Police Regional Office (PRO) 7 nangandam sa seguridad lakip sa pagpatawag sa security officers sa malls ug ubang dagkong establisamento sa duha ka mga dakbayan.
Si Police Brigadier General Albert Ignatius Ferro, hepe sa PRO 7, nagkanayon nga dunay kamandoan gikan sa ulohan sa kapulisan sa Camp Crame sa pag-abag sa malls sa pagpatuman sa protocol sa new normal.
Ubos sa GCQ, magpadayon ang protocol aron paglikay sa pagkaylap sa Covid-19. Ang mga estibilisemento nga dili mopatuman sa protocol mahimong pasirad-an og balik.
“The one that will enforce the mandatory wearing of face mask, social distancing of two meters should be maintained and the minimum health standard should be followed by the malls,” matod ni Ferro.
Gitahasan usab ni Ferro ang iyang ground commander nga makigtagbo sa mall owners bahin sa pagbalik sa negusyo.
Gikinahanglan nila ang kooperasyon sa mga mall security labot sa pagtuman sa protocol nunot sa mga kabalaka nga mosaka na usab ang gidaghanon sa mga mataptan sa Covid-19.
“Again, we would like to request the cooperation of our mall owners specially the security guards and the managers of the different restaurants that will soon be open to really follow (the protocol),” dugang ni Ferro. (AYB)