SUPERBALITA CEBU

Bug-at nga multa gahuwat sa drivers

MAGMATNGON: Nagsugod na og biyahe og balik ang pipila ka modern jeep sa Dakbayan sa Lapu-Lapu nga karon ubos na sa general community quarantine (GCQ). Kinahanglan magmatngon ang mga driver sa pagsunod sa mga lagda sa pagpamasahero kay bug-at nga mga multa ang naghuwat kanila. (Alan Tangcawan)

DI TUNGOD kay aduna nay pampubliko nga transportasyon sa mga dapit nga gipaubos sa general community quarantine (GCQ) mokampante na ang publiko sa mga lakang batok sa coronavirus disease 2019 (Covid-19).

Bisan gani sa pagsakay, angay usab nga mosunod sa mga lagda ang mga drayber ug konduktor kay dunay bug-at nga mga multa base sa gipagawas nga bag-ong guideline.

Ang Land Transportation Office (LTO) miluwat sa Memorandum Circular 2020-2185 diin gisaysay niini guidelines nga angay sundon sa drivers atol sa pagpamasahero sa kadalanan.

Aron magpabilin ang kaluwasan sa panglawas sa pampubliko nga transportasyon, gikinahanglan gihapon ang pagsul-ob og maskara ug gwantis sa drivers sa tanang panahon sa iyang pagpamasahero.

Lakip nga kinahanglan mag-maskara ang mga pasahero ug did-an kini sa pagsakay kon way mask. Kon available na ang Automatic Fare Collection System (AFCS), gidasig ang pampubliko nga sakyanan nga ipatuman kini.

Kon dili pa kini available, mobayad daan ang pasahero sa plete sa dili pa mosakay.

Kinahanglan usab i-disinfect ang mga pampubliko nga sakyanan sa di pa mamasahero ug ineg human niini o matag tulo ka oras.

Multa

Kon ugaling di motuman ang drayber, posible nga mag-atubang og kalapasan sa Joint Administrative Order 2014-01.

Makamulta kini og P2,000 sa unang kalapasan; P3,000 sa ikaduha; ug P10,000 alang sa ikatulo nga kalapasan.

Mamahimo nga masuspenso og tulo ngadto sa unom ka buwan ang lisensiya sa driver o mas grabe, matangtangan kini sa iyang lisensiya.

Alang sa magginahi ug dili motuman sa physical o social distancing, mamahimo kining makamulta og P1,000 diin kalapasan kini sa "overloading of passengers" sa JAO 2014-01.

Samtang ang drivers nga wala malakip sa Authorized Person Outside Residence mamahimo kining makamulta og P3,000 o kalapasan kini sa "Driving without a Valid License" ubos gihapon sa JAO 2014-01.

Alang usab sa mga pampubliko nga sakyanan nga way special permit gikan sa Land Transportation Franchising and Regulatory Board (LTFRB), makamulta ang jeep niini og P50,000; van og P200,000, ug bus nga P1 milyon.

Daan nang gianunsiyo sa LTFRB 7 nga libre ang special permit atol sa GCQ.

Mamahimo usab nga ma-impound ang unit sulod sa tulo ka buwan o pataas. (HBL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph