Pasyenteng namatay may Covid; 5 ka nurse sa Balamban gi-isolate

LIMA ka mga nurse sa Balamban Provincial Hospital gi-quarantine human masuta nga positibo sa Covid-19 ang ilang pasyenteng taga Pinamungajan nga namatay niadtong Mayo 19, 2020.

Ila na usab nga napahibawo ang doktor nga nag-atiman nga taga Dakbayan sa Sugbo.

Matod sa Facebook page sa lungsod sa Balamban, si municipal health officer Dr. Napoleon Macapaz niingon nga ala 1 pa lang sa hapon sa Sabado, Mayo 23, ilang nadawat ang resulta sa swab test sa pasyente.

Ang post wa magbutyag kon lalake o babaye ba ang pasyente.

Matod sa post nga niadtong Martes sa alas 10 sa buntag gidala ang pasyente ug paglabay sa usa ka oras, namatay.

Lima ka mga nurse ug usa ka doktor ang na-expose sa pasyente kay maoy nag-atiman.

Ang mga nurse nga puro nagpuyo sa Balamban gipang-isolate na sa quarantine facility sa Balamban Provincial Hospital.

Gipangkuhaan na usab sila og swab sample. Ang ilang tagsa ka pamilya gipang-isolate sa balay ug gipangkonsiderar nga person under monitoring (PUM).

Gipangsubay na usab sa Rural Health Unit (RHU) ang mga tawo nga ilang na-contact sukad niadtong Mayo 19.

Si Macapaz niingon nga di angay mabalaka ang mga Balambanon kay nagsubay na sila sa mga tawo na-contact sa mga nurse.

Masuso namatay

Namatay ang usa ka buwan nga masuso nga gikan sa lungsod sa Argao nga positibo sa coronavirus disease 2019 (Covid-19).

Kini maoy gipahibaw ni Argao Mayor Allan Sesaldo, Mayo 22, 2020. Si Sesante wa mosulti kon babaye ba o lalake ang masuso.

Matod ni Sesaldo nga ang masuso ug pamilya niini nagpuyo sa Sitio Sutil, Barangay Tulang, bukiran nga bahin sa Argao.

Giingong giubo ug naglisod pag ginhawa ang bata hinungdan nga dali nga gidala sa Deiparine Community Hospital sa Sibonga ug gi-refer dayon sa Talisay District Hospital.

Gikan sa Talisay, gibalhin dayon kini sa mga ginikanan sa Vicente Sotto Memorial Medical Center (VSMMC).

Sa Biyernes sa kaadlawon, Mayo 22, namatay ang masuso. Sanglit di man madala pag-uli ang lawas, kinahanglan nga i-cremate kini. Nipasalig ang local government unit (LGU) nga sila ang moabaga sa gastohanan sa pagpahipos sa lawas.

Human nga nakadawat og impormasyon ang LGU, dali kini nga misubay sa mga tawo nga nakahimamat sa pasyente.

Ang pamilya ug kabanay gi-isolate na samtang ang nahisgutang sitio gi-lockdown.

Gipahibawo ni Sesaldo nga ang kalangay sa pagpadangat niya sa impormasyon sa mga konstituente tungod sa protocol nga angay agian una pa ibutyag ang kompletong detalye.

Nanghinaot si Sesaldo sa mga taga Argao nga magpabilin nga alerto ug di motuo sa mga taho nga dili gikan sa LGU ug way kapasikaran. Kini aron nga malikayan ang karatol. (ANV, REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph