SUKAD gisuspenso ang mga publikong misa ug relihiyusong mga panagtapok tungod sa coronavirus pandemic, niminos ang mga halad nga nakaingon sa pagminos sa koleksyon sa Archdiocese of Cebu.
Maayo gani kay duna silay savings, kita sa investments ug mga donasyon nga maoy ilang gigamit og suporta sa ingon di sila makapanaktak og mga staff.
Si Fr. Joseph Anore sa Office of Economic Affairs-Oeconomus sa Archdiocese, niingon nga sukad ang mga simbahan sa Sugbo gisirhan sugod niadtong Marso 18, 2020, wa na sila mangolekta sa bahin sa archdiocese gikan sa mga parokya, nga maoy ilang tinubdan sa pundo.
"Grabe ang drop g'yod. Example lang sa amo sa Cathedral, ang among gisaligan... Naa man gihapo'y magpamisa namo kay i-livestreaming man. Pero, lahi jud ang naay collection sa actual," siya niingon.
Dunay mga 170 ka parokya, lakip na sa ilang mission stations, ubos sa Archdiocese of Cebu.
Bisan tuod kon naigo sa pandemic ang panudlanan sa archdiocese, matod ni Anore nga nagpadayon gihapon sila sa ilang mga operasyon pinaagi sa paggamit sa ilang mga pundo gikan sa savings, investments ug daghang mga donasyon gikan sa mga benefactor.
Matod niya nga ang archdiocese napadayon sa ilang pag-abaga sa archdiocesan commissions sama sa Worship and Liturgy, lakip na ang benefits sa mga pari, labina sa mga retirado. (WBS)