BAGUIO

Agkakawil a parikut gapu ken Covid-19!

Karit ken Kayetket

ITAY nabiit, nagsasaruno dagiti enkuentro iti nagbaetan dagiti puwersa-militar kontra NPA ken ASG. Adu dagiti naipatli. Nagsasaruno met dagiti uram nangruna iti deppaar ti NCR. Adda dagiti pimmusay ken adu ti naawanan iti taeng ken pagsapulan. Agasem dagita a parikut a gumidgiddan iti nadagsen a paspasarentayo a Covid-19. Ti nakasaksakit, dagiti pay nagpakni a kakailiantayo nga agrigrigat ken dipay nakaraman iti ayuda... isuda manen ti nabiktima kadagita a trahedya. Di marukod a saem ken ut-ot ti sagsagrapen piman dagiti nabitkima. Awan dumana met ti laklak-amen dagiti napanawan dagiti pimmusay gapu iti Covid agraman dagiti pamilya dagiti nagpositibo a madama a makirangranget ken patay.

Tsk tsk... graben dagiti paspasamak, kailian... ngem intay man lukiben dagiti naglabas a panid ti kallabes bareng ta makaep-ep iti an-anek-eken:

***

Maka-buisit a kontrobersiya: Maysa a kabagyan kano dagiti Marcos ti nagparammag itay laeng nabiit panggep iti panangkaritna kadagiti nababaknang kano tapno tumulong met kadagiti nabiktima ti Covid-19. Kinaritna babaen iti media dagiti addaan a tuladenda koma kano ti ar-aramidenna a tumultulong. Adu ti naklaat kadagiti inrakrakurakna a tulong gapu ta isu kano ket manangaasi a bilyonaryo. Natural nga adu ti kimmagat. Adu ti nagtamed iti kinaparammagna. Ngem ania ti napasamak? Kinamat ti linteg daytoy babaen iti NBI. Nekemmeg ken naduptalan nga adu gayamen dagiti linukluko ti kinapasaw ken kinapalangguadna. Ti bangsitna, ditoy pay Baguio City ti nakapasamakan dagita nga illegal nga aramid. Dayta ti gapuna a naggapu met laeng iti korte ditoy siyudad ti mandamiyento tapno daytoy ket maaresto ken makassuan.

Tsk tsk...dayta ti mangipakita nga awan ti paginggaan ti kinasuitik ken kinaparammag no di pannusa ken umno a hustisya. Malagiptayo pay ti maysa idi a nairakurak a mangidonar kano daytoy iti trak-trak a bagas para kadagiti biktima ni Covid-19 sana pinasarunuan ti karitna kadagiti nababaknang a tuladenda koma daytoy nga ar-aramidenna. Saanmi a kinagat ti pasablog no di ketdi naguraytayo iti addang dagiti maseknan. Suma-total, adu pay gayam dagiti kaskasona kadagiti naglabas nga aldaw.

Ti adal: ‘Di basta-basta mamati kadagiti nasasam-it a pannao ta adu amangan ta dayta ti pakaisagmakam. Kunada ngarud, dika sigida a mamati kadagiti palsipikado a propeta. No sibibiag laeng koma daydi lolok, maymaysa ti ipir-akna a basnot: “Kadagiti palso ti utekna, iti sangapulo nga ibagana, sangapulo ket maysa ti pasaw wenno parparbo laeng.”

He he... kasla dita a timmama ni lolok ‘nia? Adu ti kasta iti kagimongan, pards. Adu dagiti nalalaing a sumarita. Natagtagapulutan kano ti dilada. Kabaelanda ti mangyalis iti alipuspos. Ngem arasaas daydi lolok: “dikay mayalis ti alipuspusko ta sangadosena. Adtoy ti benteng... gumatangka laengen iti katungtongmo, buisit!” Siguro, dayta ti rumbeng a pilosopiyatayo iti agdama a sasaadentayo kenni Covid-19.

Ditay kumagat kadagiti balangkantis wenno peke nga appan sileng man iti relief wenno kuwarta ta sigurado a daytoy ti pakaisagmakam. Uray agdildilkan kabsat iti asin no limpiyo ti konsiyensiyam, makaturogka a siisem kan natalinaay.

***

Simngat a kontrobersiya itay kallabes dagiti eksena a panagipuslit iti arak. Mailagip a naipaulog babaen kadagiti LGUs ti liquor ban wenno pannakaiparit kadagiti makabartek nga inumen. Idi damo, awan nasalawtayo a panaglabsing. Ngem iti kinaunday ngatan iti aldaw a din makatimtim iti nasanger dagiti mangnginum... ditan a nagrigudon dagiti pasamak mainaig iti arak. Adda naipadamag a naaramat pay ti maysa nga ambulansiya tapno makaipuslit laeng iti arak. Adda nakassuan. Adda met naaput a pulis ken kaduana iti maysa a checkpoint gapu iti kahon-kahon nga arak a kayatda nga ipuslit. Ngem guray, pards...kahon-kahon dagita nga arak. Impusipos met a rasyonda laeng daytoy.

Adda nagkuna: amangan ta ilaklakoda. So, negosyo ti puonanda. Adu pay dagiti kas kadagita a pagteng. Nabukoda kadagiti checkpoints. Imbag laketdin. Ngem guray latta, pards. Gapu iti bisyo, adu ti kumagat iti buneng (kumakapit sa patalim) uray ammoda nga illegal ken nadagsen ti pannusa. Adda nagkuna, kastan sa kano ti ugali ti tao. No ania ti maiparit, pagay-ayatda nga aramiden. Adda met nangipasarunson, nasamsam-it kano tay bunga a tinakaw ngem tay ginatang ken dinawat.

He he... malagipko manen daydi lolok. Pagay-ayatna ti ag-kabaret ta dita kano ket adda “tatakawen a darikmat ngem nasamsam-it kano ngem iti daydi lolak. Resulta: Idi nabuko, “naquarantine” ni lolok iti bakud ti palda ni lolak.

Tsk tsk...no koma ta mabalin a kastoy ti eksena: agpakadaka nga umuna sakbay a tumakawka. Ngem di met mabalin, saan aya, pards? Apay mabalin aya a kunaem: “Pare, agpakadaak man ta takawek diay manggam?”

Ti adal: mapaspasamak itan dagita a pangngarig no relief wenno ayuda ni Covid-19 ti saritaan. Addan dagiti naireport nga opisyales ti barangay ti makikunniber kadagiti umawat iti ayuda tapno makigudduada no maawaten ni benepisyaryo ti para kenkuana. Masiertomi, madusanto dagita. Isarunoda koma met a duptalen no kasano a nakaawat iti ayuda dagiti nabayagen a natay.

***

Adun dagiti pamkuatan dagiti nagduduma a nasyon tapno makabirokda laeng iti agas wenno bakuna (vaccine) kontra Covid-19. Ngem agpapan kadagitoy a tiempo, awan pay padamag a nagballigi. Natural, agiksperimentoda pay, pards. Saan laeng nga isuda. Uray ditoy pagiliantayo, adu met dagiti nasasaririt ti mangikagkagumaan a makapartuat iti bakuna wenno agas kontra Covid.

Sabagay, kunada... nagasatka no sika ti makaduptal iti nakuna nga a bakuna. Tonelada a pirak ti marsuod kenka, pards. Agasem, sangalubongan ti isalakanmo babaen iti partuatmo nga agas? Adda pay nagkuna a kadagiti nasusulinek a disso ditoy pagilian nga ayan dagiti maaw-awagan iti “albularyo” ket amangan ta manarimaanen ti panagsukisokda kadagiti kabakiran nga ayan dagiti bulbulong, ukis ken ramramut a mabalin a makapataud iti agas a pagbaknangan.

He he...sige, kailian, agsukisuktayo bareng ta makatumpongtayo ngay iti agas nga agpayso. Saanka laeng nga agbalin a bannuar iti pagilian no di ketdi sangalubongan. Mangibingaykanto met, pards wen. Malagipko ti nakuna itay nabiit ni Pres. Duterte: “Amangan ta inton Enero iti umay a tawen, addanton bakuna kontra Covid-19. Isu dika’y pay matmatay. No umay kenka ti kallawit ni patay (kamatayan) , ibagam kenkuana a dinaka pay suksukonen ta ur-urayem pay ti bakuna a dumteng.” Makaisemka man kabsat iti pannarita ni Pres. Duterte, nabagas ti kaipapanan ti pasablogna. Ditay itulok a kallawitennatayo ni sakit (virus). Agannadtayo ken papigsaentayo ti resistansiyatayo tapno dinto agballigi ni Covid-19.

***

Adu dagiti kangrunaan nga adal nga imburay ni Covid-19 kadatayo. Umuna, nalagiptayo ti tumangad a kumaraba iti tulong ti Apo. Maikadua, nagtulnogtayo nga agannad. Maikatlo, nakariknatayo iti sidir a tumulong iti padatayo. Maikapat, nagbalintayo a simamata, silalapayag ken addaan dila a tulbek iti legal nga addang iti tengnga ti trahedya kontra kadagiti maikaniwas nga aramid iti kagimongan. Dagitanto nga adal ti manayon a kas batonlagip nga ibati ni Covid-19 iti pulitayo. Adios mi amor, ciao, mabalos.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph