SUPERBALITA CEBU

Super Blowout: Gipaagi og serbisyo ang pagsaulog sa birthday

BISAN og wala kaayo’y nadawat nga mga regalo si John Carlo Toleza sa kasaulogan sa iyang birthday karong tuiga kon itandi sa miaging tuig, apan nahimo kini nga makahuloganon tungod sa iyang pagserbisyo sa ilang barangay sa Tisa, siyudad sa Sugbo.

Niadtong Mayo 11, gisaulog ni Carlo ang ika-26 nga sumad sa iyang pagkatawo.

Tungod sa krisis sa Covid-19, way nahitabo nga dako nga salosalo atol sa iyang espesyal nga adlaw.

Apan wala niya kalimti ang Labaw nga Makagagahum sa iyang kasaulogan kay siya ang nangunay aron makita sa online ang live streaming sa misa sa San Lorenzo Ruiz Parish ug makasimba ang mga tawo bisan diha sa Facebook.

Si Carlo nagboluntaryo sa ilang barangay sa Tisa. Apil sa iyang mga gimbuhaton ang mag-update sa Facebook page sa ilang barangay ang Tisa Bulletin, mag-live kon dunay mga panghitabo o balita nga angay masayran sa mga molupyo, mokuyog sa mga mag-roving sa mga sityo ug uban pa.

Usa siya sa mga staff ni Cebu City Councilor Phillip Zafra sa Cebu City Hall. Ug aron makapadayon siya og pangalagad sa publiko bisan wa sila’y duty sa city hall, nag-volunteer siya sa ilang barangay.

Naandan ni Carlo nga matag saulog niya sa iyang birthday, manghatag sila og food packs sa mga bata sa mga sityo nga naa sa mga bungtod nga bahin sa barangay.

Apan karong tuiga, tungod sa Covid-19, wala una niya kini mabuhat.

Apan tinguha niya nga himuon kini sa higayon moarang-arang na ang kahimtang dinhi sa siyudad.

Sa miaging tuig, 150 ka mga bata ang nakadawat og food packs sa duha ka mga sityo sa ilang barangay.

Niadtong 2017, nagsugod kini nga binuhatan ni Carlo diin ang mga tawo nga ilang nakit-an diha sa kadalanan ang ilang gihatagan og food packs. Sulod niini ang sud-an, kan-on, juice, tubig, biskwit ug kape.

Nahimo kini nga posible tungod sa iyang mga kaliwat nga tua sa abroad nga kanunay nag-sponsor ug nagsuporta niya.

Apil sa mga wish ni Carlo sa iyang birthday nga mahuman na ang krisis nga giatubang karon sa tibuok kalibotan sa Covid-19, padayon nga makaserbisyo sa publiko, padayon nga himsog ug baskug ang iyang panglawas ug sa iyang pamilya ug dugang blessings sa kinabuhi. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph