SUPERBALITA CEBU

Diola: Way klaro

Mao Diay

Binasi sa Mga Buhat 1:1-11; Salmo 47; Taga Efeso 1:17-23; Mateo 28:16-20

KARONG adlawa gisaulog nato ang Solemnidad sa Pagkayab ni Jesus. Misaka siya sa kalangitan. Apan maglibog ta kay ang atong ebanghelyo walay hisgot sa maong pagsaka ni Jesus. Apan miingon si Jesus: “Gihatag kanako ang tanang gahom sa langit ug sa yuta”. Mao kini ang kalambigitan sa atong ebanghelyo sa Pagkayab ni Jesus. Sa dihang misaka siya, kini misimbolo sa paghatag kaniya sa tanang gahom sa langit ug sa yuta. Labaw siya niining tanan, lakip na sa mga anghel.

Human niya gipadayag kini, midugang si Jesus: “Busa panglakaw kamo, himoa ninyo nga mga tinun-an ang tanang kanasoran; bunyagi sila sa ngalan sa Amahan, ug sa Anak ug sa Espiritu Santo, tudloi sila sa pagtuman sa tanan nga akong gisugo kaninyo”. Kining pagtudlo sa tanang kanasoran napahigayon – ug gipahigayon sa kasamtangang panahon – pinaagi sa gahom sa Espiritu Santo nga maoy mopahinumdom sa tanan nga gitudlo ni Jesus ngadto sa iyang mga sumusunod, sumala pa sa ebanghelyo ni Juan.

Hilabihang ka himayaon diay kaayo sa Pagkayab. Wala nay lain pang panghitabo, gawas sa pagbalik ni Jesus, nga mipatataw sa Iyang langitnong himaya nga misidlak sa kalibotan. Apan sa wala pa mosulti si Jesus sa iyang gipangsulti, mabasa nato sa ebanghelyo: “Ug sa pagkakita nila kaniya, gisimba nila siya; apan adunay uban nga nagduhaduha”.

Way klaro pa diay tong gitahasan ni Jesus sa pagpanudlo ug pagbunyag sa uban. Lalim mo na, ang Nabanhawng Jesus ang nagpakita kanila ug may nagduhaduha pa gihapon. Kining “pagduhaduha” sa pinulongang Griyego susama gyod sa Binisaya: “duha” ka “gibarogan”. Sa ato pa, gapalingpaling. Way klaro.

Sa laing bahin, wala sugata ni Jesus ang ilang pagduhaduha sa iya usab nga pagduhaduha. Gani gihatagan hinuon niya sila og misyon. Apan nakita niya ang ilang kahuyang ug pagkatawhanon apan wala niya kini panumbalinga. Sa tawhanong hiyas, mora sad og way klaro si Jesus. Mao kini ang misteryo sa kaluoy ug gahom sa Dios. Sama nga misaka siya sa kalangitan, taas pod ang pagtan-aw niya sa ilang nagpahiping pagtuo ug abilidad. Gipukaw niya sila pinaagi sa pagsalig niya kanila.

Ang atong naandang larawan sa Pagkayab ni Jesus mabasa sa Mga Buhat sa mga Apostol diin si Jesus misaka ibabaw sa usa ka panganod. Nahitabo kini human siya mosaad sa iyang Espiritu ngadto sa mga apostol, kansang Espiritu mohimo kanilang mga saksi kang Jesus sa kinatumyan sa kalibotan.

Unsay may ihatag sa Espiritu kanila? Midugang ang sulat sa taga-Efeso nga kining Espiritu sa kinaadman ug pagpadayag moabri sa “mga mata sa mga kasingkasing” sa mga sumusunod ni Jesus aron masinati nila ang paglaom, nga mao ang “kabuhong sa himaya sa iyang kabilin”. Kining naghulat nga himaya, nga nagasugod na karon, maoy magtukmod sa mga tumutuo sa pagsangyaw sa Maayong Balita.

Ang way klaro natin-aw pinaagi sa maluluy-ong gahom sa Dios. Klaro na ba kanato ang gugma ug gahom sa Dios o nagpabilin ba kita sa atong pagduhaduha?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph