SUPERBALITA CEBU

Mongaya: Ayaw lang gud pangilad

Panahom

KLARO man nga ang mass testing dili hinungdan sa pagsaka sa mga kasong positibo dinhi sa Syudad sa Sugbo. Igo lang kining mokumpirmar sa mga positibo na daan.

Apan makahimuot kay mao kini ang perming ibalikbalik sa mga tigpamaba nga dili gustong madaot ang mga opisyal sa Cebu City Hall labi na si Mayor Edgar Labella.

Wa nila hunahuna-a nga ang ingon niini nga pangilad mao hinuon ang makadaot kang Mayor Labella. Mura man gud hinuon og giinsulto ang mga Sugboanon.

Klaro baya sa mga chat group nga gihimong pasi-aw ang maong punto. Alang kanako, mas maayong hunongon na lang ug maghisgot kitag tinuod.

Ingna ko nga sayop ang akong paminsar karon. Apan kining akong panahom basi sa mga numero nga gi-post sa Facebook sa Mandaue City Public Information Office sa miaging Mayo 19, 2020 sa alas 8:35 sa buntag.

Sa mga di motuo dayon, palihog og search karon dayon aron matino ninyo nga dili kini fake news.

Atong nasayran gikan sa maong Facebook post nga moabot og 6,034 ang na mass test sa Syudad sa Sugbo niadto tungora. Mas daghan ang diha sa Syudad sa Mandaue nga moabot og 6,516 ug sa Syudad sa Lapu-Lapu nga 6,747.

Apan nianang tungora, gibalita na nga walo ka barangay sa Syudad sa Sugbo ang apil sa Top 50 sa labing daghan ang na-Covid-19 sa tibuok Pilipinas.

Ang Top 1 ug Top 2 mao ang Barangay Mambaling ug Barangay Kalunasan.

Mas daghan ang na-test sa Syudad sa Mandaue ug Lapu-Lapu kon itandi sa Siyudad sa Sugbo. Apan nganong ang Syudad sa Sugbo naa sa top 50 apan walay barangay ang Mandaue ug Lapu-Lapu nga anaa sa top 50.

Di mangilad ang statistics nga gihatag sa Mandaue City Public Information Office. Wa lang gi-analisa sa pagtarong. Tingale aron di maulawan ang mga opisyal sa, matod pa, labing preparado nga syudad sa tibuok nasud.

Naay pasyente?

Ambot kon duna bay mga reporter nga nilili karon sa mga quarantine center sa North Reclamation Area (kadtong gisaad nga mahuman og 10 ka adlaw apan sa pagka tinuod 40 ka adlaw diay) ug ang quarantine center diha sa Sacred Heart.

Sigi man sa pagsaka ang kadaghan sa gi-Covid-19 sa Syudad sa Sugbo, apan walay balita kon ila bang nagamit kining mga quarantine center.

Di ba naa say plano nga himuong quarantine center ang IEC ug naa pa kadtong gipanghambog nga naa sa bukid?

Nangutana sab kita kay wa pa gani magamit kining maong mga sentro, naa na say laing P50 milyones alang sa laing quarantine center sa South Road Properties (SRP).(@anol_cebu in Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph