SUPERBALITA CEBU

Editoryal: Itugyan sa LGU

Editorial Cartoon by John Gilbert Manantan

UPAT na ka tag-as nga mga opisyal sa mga local government unit (LGU) ang nanghangyo sa nasudnong kagamhanan nga tugotan ang pag-angkas, labina kon mga kabanay. Kay nganong mag social distancing man nga nagpuyo ra sa usa ka balay.

Gani, si Lapu-Lapu City Mayor Junard Chan mohatag unta og angkas card ngadto sa mga lumolupyo nga dunay motorsiklo nga paangkasan lang sa sakop sa pamilya.

Karon man gung panahuna, naa man sa enhanced community quarantine o general community quarantine, ang mga kabos maglisod og sakay. Usa ni sa mga rason nganong kalit nga nahimong popular ang biseklita ug electric bikes (E-bike). Mas barato ug makasarang ang yanong tawo sa pagpalit.

Naa gani uban intawon nanag-antos sa paglakaw padung ug pauli sa trabaho kay kon di man makapalit og biseklita, di sab kahibawo motindak. Naa man unta tuoy motorsiklo, di usab sila makaangkas kay gidili lagi tungod sa social distancing.

Ang paagi ni Chan maayo unta. Mas maayo gani unta kon ang barangay manginlabot usab sa paghatag og dokumento nga magmatuod nga sakop sa pamilya ang angkas. Nahimo gani kini sa mga barangay, nang-isyu sila og kaugalingong ECQ pass. Nganong di man sa angkas card?

Kon nabalaka si Land Transportation Office (LTO) Regional Director Victor Caindec nga di nila maato ang pagbantay ug pag-check sa mga ang-angkasay, naa may LGU checkpoints nga makapatuman niini. Bisan gani sa barangay level, naay control checkpoints.

Karon kinsa man ang aktibo kaayo sa pagsusi sa mga identification (ID) card ug pass sa karsada, di ba ang kapulisan ug LGU man? Naa bay mga LTO personnel kada checkpoint? Wala, bisan gani anino lang. Mao unta kini ang angay sabton sa national officials. Yuna pa, gisusi ba kanunay sa LTO nga ang tanang nag-drive og mga sakyanan lisensyado ba?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph