ORMOC CITY, Leyte -- (UPDATED) Duha ka tawo ang patay sa dihang gianod sa kusog nga bul-og sa tubig sapa.
Ang insidente nahitabo sa Sitio Pikas, Barangay Liloan ning dakbayan, pasado alas 3:30 sa hapon, Sabado, Mayo 23,2020.
Giila ang mga biktima nga sila si Rogelio Balunan, 63, minyo, ug Gerald Kent Balunan, 23, pulos nagpuyo sa samang lugar.
Ang Police Station 3 nakadawat og tawag bahin sa insidente ug dali nga girespondihan pinangulohan ni Police Major Reynaldo Honrado.
Base sa iniyal nga imbestigasyon, nanguha og kinhason ang duha ka biktima sa dihang aksidente kini nga naanod sa tubig sapa.
Nanawag usab og rescue team ang pamilya sa biktima alang sa rescue and retrieval operation sa duha ka biktima.
Nianang alas 6 sa gabi, narekober sa mga rescuers si Rogelio apan wala na kini kinabuhi samtang padayun nga gipangita si Gerald Kent.
Midisisyon ang rescue team nga ipadayun sa mosunod nga adlaw ang operasyon tungod sa kangitngit na sa palibot.
Alas 2:30 sa hapon, Dominggo, Mayo 24, nakit-an sa mga rescuers ang patayng lawas ni Gerald.
Sa paghimo ning balita, padayun pa ang imbestigasyon sa mga awtoridad. (JKDP)