MILUWAT na ang Land Transportation Office (LTO) sa iyang implementing rules and regulations (IRR) para sa Republic Act No. 11235 kun Motor Crime and Prevention Act.
Ang makalapas ug dili mosunod sa IRR adunay multa nga mobalor og P20,000 ngadto sa P100,000 nga pagabayran sa nagmaneho sa motorsiklo.
Sa 13 ka pahina nga IRR ug gipirmahan ni Assistant Secretary Edgar Galvante sa LTO, nagkanayon kon ang plate number sa motorsiklo nawala, nadanyos o gikawat, ang tag-iya kinahanglan mo-report ngadto sa kapulisan o LTO sulod sa 72 oras ug moduso og notaryadong affidavit alang sa paghulip sa plate number.
"Failure of the owner to report the same and apply for replacement plate from the LTO within the periods prescribed herein shall subject the owner to a fine of not less than P20,000 but not more than P50,000," tipik sa Section 12 sa IRR.
Mas dako og multa ang ang pag-erase, tamper, forging, imitating, covering, concealing sa number plate or intentional use thereof nga ang multa nagsugod sa P50,000 hangtod P100,000 subay sa Section 13. Ug susamang multa ang paggamit sa maong mga plate number nga itaod sa laing mga motorsiklo.
Sa Section 14 ang rider nga mapamatud-an nga guilty sa paggamit sa kinawat nga plate number mapriso kini o makamulta hangtod P100,000 o ang duha isilot kaniya depende sa hukom sa korte.
Ang momaneho nga walay plaka o dili mabasa ang iyang plate number aduna gihapoy multa nga P50,000 ngadto sa P100,000.
Ang mga motorsiklo nga nabaligya kinahanglan nga marehistro sulod sa 5 ka adlaw aron dili makamulta og P20,000 ngadto sa P50,000 ug mahimo usab nga arestuhon ang nagmaneho sa dili rehistrado nga motorsiklo ug ang maong sakyanan gigamit sa krimen, P50,000 ang ipahamtang nga multa.
Apan unsa man ka dagko ang plate number sa mga motorsiklo ug unsay color sa plaka sa Region VII?
Base sa IRR, sa Central Visayas adunay color orange diin ang motorsiklo adunay duha ka plate number apan decals o stickers ang atubangan inay metal nga adunay gidak-on nga 85mm (height) x 133mm (width) nga dako og gamay sa orihinal nga plaka.
Sa metal plate, aduna kini gitas-on nga 135mm ug 235 mm ang gilapdon ug reflectorized ang background uban sa iyang security features nga igong mabasa sa gilay-on nga 15 metros.
Gipasar ang maong balaod gumikan sa kakusog sa krimen labi na sa riding in tandem ug mga pagpanulis gamit ang motorsiklo aron maminosan ang susamang mga panghitabo.
Apan ang LTO wala pa mobutyag sa tukmang petsa sa hingpit nga pagpatuman niini.
Supak
Usa ka lider sa grupo sa kahugpongan sa Sugbo supak sa doble plaka.
Si Gabriel Verallo, founder sa Basakanon Riders, niingon nga dili makatabang kanila ang doble plaka sa mga motorsiklo.
Alang kaniya nga sa na andan mas haum ra man para kaniya ang plaka sa ilang motorsiklo nga anaa sa likod nakapilit.
Si Verallo nabalaka kon mapatuman na ang doble plaka sa mga motor tungod kay magdoble na usab ang ilang bayranan kon kini ipatuman na ang pagparehistro na sa motorsiklo.
"Nagbayad na baya mi sa atubangan karon kon ila pang dugangan sa atubangan magbayad na sab mi which is very, very useless," matod ni Verallo.
Alang kang Verallo ang pagbutang og plaka sa atubangan sa mga motor mabutang na nga mawala ang aero dynamics sa motor nga maoy desinyo sa mga two-wheel motorcycles.
Awhag ni Verallo sa maong ahensiya nga mas maayo nga unahon una sa paghatag nila sa ilang mga plaka nga gipangbayran nga hangtud karon duha na katuig ang milabay wala pa gyud mahatag kanila
"Kung ingon ana magtriple na ang atong bayad, ngano man? Wala pa nahatag ang among mga plaka so, kami nagpabuhat og temporary plate ug dugangan nila mag bayad nasab mi," dugang pasabot ni Verallo.